മലപ്പുറം:ലഹരി വസ്‌തുക്കളുമായി ബൈക്ക് യാത്രികരായ രണ്ട് യുവാക്കള്‍ എക്സൈസ് പിടിയിലായി. പരപ്പനങ്ങാടി ചെട്ടിപ്പടി വലിയവളപ്പില്‍ ശ്രീരാജ് (22), തിരൂര്‍ ചെറിയമുണ്ടം ഇരിങ്ങാവൂര്‍ പാലക്കല്‍ മുഹമ്മദ് മുസ്തഫ (21) എന്നിവരെയാണ് വാഹനപരിശോധനയിൽ എക്സൈസ് അറസ്റ്റ് ചെയ്‌തത്. ഇവരില്‍ നിന്ന് ഏഴ് ഗ്രാം ക്രിസ്റ്റല്‍ രൂപത്തിലുള്ള എം.ഡി.എം.എ, 39 ടാബ്ലറ്റ് രൂപത്തിലുള്ള എം.ഡി.എം.എ , 30 എല്‍.എസ്.ടി സ്റ്റാമ്പുകള്‍,അമ്പത് ഗ്രാം കഞ്ചാവ് എന്നിവ പിടിച്ചെടുത്തു. ഇവര്‍ സഞ്ചരിച്ച പള്‍സര്‍ ബൈക്കും എക്സൈസ് കസ്റ്റഡിയിലെടുത്തിട്ടുണ്ട്.
ബംഗളൂരുവില്‍ നിന്നാണ് ഇവര്‍ ലഹരി പദാര്‍ഥങ്ങള്‍ കൊണ്ടുവന്നതെന്നും ഇരുവരും ലഹരി ഉപയോഗിക്കുന്നവരും വില്‍പനക്കാരുമാണെന്ന് എക്സൈസ് ഇന്‍സ്പെക്ടര്‍ പറഞ്ഞു. വഴിക്കടവ് ആനമറി ചെക്ക്പോസ്റ്റില്‍ ഒരാഴ്ചക്കിടെ പിടിക്കപ്പെടുന്ന രണ്ടാമത്തെ എം.ഡി.എം.എ കേസാണിത്. കഴിഞ്ഞ ദിവസം 810 മില്ലി ഗ്രാം എം.ഡി.എം.എയുമായി പട്ടാമ്പി സ്വദേശിയായ യുവാവും ഇവിടെ അറസ്റ്റിലായിരുന്നു. പ്രിവന്‍റീവ് ഓഫീസര്‍ എന്‍. അബ്ദുല്‍ വഹാബ്, സിവില്‍ എക്സൈസ് ഓഫീസര്‍മാരായ ശബീര്‍ മൈത്ര, വി. ലിജിന്‍, എല്‍. ബാബു എന്നിവരടങ്ങിയ സംഘമാണ് പരിശോധനയില്‍ പങ്കെടുത്തത്.
