ബസും ബൈക്കും കൂടിയിടിച്ച് അപകടം: രണ്ട് വിദ്യാർഥികൾ മരിച്ചു

പന്തല്ലൂർ മുടിക്കോട് തോക്കാട്ടപ്പടിയിലാണ് അപകടം നടന്നത്. മരിച്ച രണ്ടുപേരും പാണ്ടിക്കാട് അൻസാർ കോളജിലെ വിദ്യാർഥികളാണ്.

മലപ്പുറം: പന്തല്ലൂർ മുടിക്കോട് തോക്കാട്ടപ്പടിയിൽ ബസും ബൈക്കും കൂടിയിടിച്ച് ബൈക്ക് യാത്രക്കാരായ രണ്ട് വിദ്യാർഥികൾ മരിച്ചു. വള്ളുവങ്ങാട് പറമ്പൻ പൂള സ്വദേശി കുരിക്കൾ ഹൗസിൽ അമീൻ(20), കീഴാറ്റൂർ സ്വദേശിയായ ചുള്ളിയിൽ ഹൗസിൽ ഇഹ്‌സാൻ(17) എന്നിവരാണ് മരിച്ചത്. വെള്ളിയാഴ്‌ച(26.08.2022) രാവിലെ 10.15 ഓടെയാണ് അപകടം.

പന്തല്ലൂർ ഭാഗത്ത് നിന്ന് വരികയായിരുന്ന സ്വകാര്യ ബസും പാണിക്കാട് ഭാഗത്ത് നിന്ന് പന്തല്ലൂർ ഭാഗത്തേക്ക് പോവുകയായിരുന്ന വിദ്യാർഥികൾ സഞ്ചരിച്ചിരുന്ന ബൈക്കും കൂട്ടിയിടിച്ചാണ് അപകടം സംഭവിച്ചത്. മരണപ്പെട്ട രണ്ട് പേരും പാണ്ടിക്കാട് അൻസാർ കോളജിലെ വിദ്യാർഥികളാണ്. മൃതദേഹം മഞ്ചേരി മെഡിക്കൽ കോളജ് മോർച്ചറിയിലേക്ക് മാറ്റി.

തുടർ നടപടികൾക്ക് ശേഷം ബന്ധുക്കൾക്ക് വിട്ട് നൽകും.