മലപ്പുറം : കരിപ്പൂരിൽ മുണ്ടോട്ടുപാടത്ത് കനത്ത മഴയിൽ വീട് തകർന്ന് രണ്ട് കുട്ടികൾ മരിച്ചു. പുലർച്ചെ 4 മണിയോടെയാണ് സംഭവം. റിസ്വാന (8) റിൻസാന (ഏഴ് മാസം) എന്നിവരാണ് മരിച്ചത്. കരിപ്പൂർ സ്വദേശി മുഹമ്മദ് കുട്ടിയുടെ വീടാണ് തകർന്നത്. ഇദ്ദേഹത്തിന്‍റെ മക്കള്‍ക്കാണ് ജീവഹാനിയുണ്ടായത്.
അപകടം നടന്നയുടൻ തന്നെ രണ്ട് പേരെയും ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വീടിന് മുകളിലേക്ക് മണ്ണിടിഞ്ഞ് വീണതാണ് അപകട കാരണം. ഉറങ്ങിക്കിടന്ന കുട്ടികളുടെ മുകളിലേക്ക് പതിക്കുകയായിരുന്നു.
Also Read: ജി20 ഉച്ചകോടി ഇന്ന് ; പ്രധാനമന്ത്രി പങ്കെടുക്കും
കഴിഞ്ഞ ദിവസം മുതൽ ശക്തമായ മഴയാണ് പ്രദേശത്ത് പെയ്‌തുകൊണ്ടിരിക്കുന്നത്. മിക്ക ജലസ്രോതസുകളും കരകവിഞ്ഞൊഴുകുകയും പലയിടങ്ങളിലും വെള്ളം കയറുകയും ചെയ്‌തിട്ടുണ്ട്.
മലപ്പുറം ജില്ലയിൽ കഴിഞ്ഞ ദിവസം രാത്രി മുതൽ പെയ്യുന്ന അതിശക്തമായ മഴ ഇപ്പോഴും തുടരുകയാണ്. പലയിടങ്ങളിലും മണ്ണിടിഞ്ഞും ജലസ്രോതസുകൾ കരകവിഞ്ഞൊഴുകിയും കനത്ത നാശനഷ്ടങ്ങളുണ്ടായി. നിരവധി സ്ഥലങ്ങളിൽ ഗതാഗതം തടസപ്പെട്ടു.
