മലപ്പുറം: ജന പങ്കാളിത്തമില്ലാതെ ക്രൈസ്തവ ദേവാലയങ്ങളിൽ ഓശാന ഞായറിൻ്റെ തിരുകർമ്മങ്ങൾ നടന്നു. വൈദികൻ ഉൾപ്പെടെ 3 പേരാണ് ദേവാലയങ്ങളിലെ തിരുകർമ്മങ്ങളിൽ പങ്കാളികളായത്. ഫെയ്‌സ്‌ബുക്കിലൂടെ ലൈവായി കുർബാന തൽസമയം വീടുകളിൽ കാണുന്നതിന് മിക്ക ഇടവകകളും സംവിധാനമൊരുക്കിയിരുന്നു. ലോക്‌ഡൗൺ നിലനിൽക്കുന്ന സാഹചര്യത്തിൽ സർക്കാർ നിർദ്ദേശങ്ങൾ പൂർണമായി പാലിച്ചുകൊണ്ടാണ് ദേവാലയങ്ങളിൽ ചടങ്ങുകൾ നടന്നത്.
വൈദികന് ഉൾപ്പെടെ 5 പേർക്ക് പങ്കെടുക്കാമെന്ന് സർക്കാർ നിർദ്ദേശം നിലനിൽക്കെ 90 ശതമാനം ദേവാലയങ്ങളിലും 3 പേരാണ് പങ്കെടുത്തത്. അടച്ചിട്ട ദേവാലയത്തിൽ ഓശാന ശുശ്രൂഷകൾ നടത്തിയത് ആദ്യമായാണ്.
ജീവിതം മുഴുവൻ വീടിനുള്ളിൽ കഴിയുന്ന ആയിരങ്ങളുടെ പ്രയാസങ്ങളും വിഷമതകളും തിരിച്ചറിയാൻ ഈ കാലയളവിൽ സാധിച്ചുവെന്നും. എല്ലാവരും ഒരേ മനസോടെ പ്രവർത്തിക്കുന്നത് കാണുപ്പോൾ ഈ ഓശാന ഞായർ നൽകുന്ന സന്ദേശം ഏറെ സന്തോഷം പകരുന്നതായും സെൻ്റ് തോമസ് ഇടവക വികാരി ഫാ.ഡൊമിനിക് വളകൊടിയിൽ പറഞ്ഞു.
