മലപ്പുറം: വണ്ടൂർ കാളികാവ് റോഡിൽ പള്ളിശേരിക്ക് സമീപം ബൈക്കും പിക്കപ്പ്‌വാനും കൂട്ടിയിടിച്ച് ഒരാൾ മരിച്ചു. മാളിയേക്കൽ പരിയങ്ങാട് സ്വദേശി ചോലക്കൽ ഉമ്മർ (58) ആണ് മരിച്ചത്. മാളിയേക്കലിലെ കരുവാടൻ ശംഷുദ്ദീനെ (56) പരിക്കുകളോടെ പെരിന്തൽമണ്ണയിലെ സ്വകാര്യ ആശുപത്രിയിൽ പ്രവേശിപ്പിച്ചു.
പള്ളിശേരി സ്‌കൂളിന് സമീപത്താണ് അപകടം സംഭവിച്ചത്. ഉമ്മറും ശംഷുദ്ദീനും കാളികാവ് ഭാഗത്ത് നിന്നും അഞ്ചച്ചവിടി ഭാഗത്തേക്ക് ബൈക്കിൽ സഞ്ചരിക്കവെ മഞ്ചേരിയിൽ നിന്നും പച്ചക്കറി കയറ്റിവന്ന പിക്കപ്പ് വാനുമായി കൂട്ടിയിടിക്കുകയായിരുന്നു. ഇരുവരേയും ആദ്യം വണ്ടൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. സ്ഥിതി ഗുരുതരമായതോടെ രണ്ട് പേരേയും പെരിന്തൽമണ്ണയിലെ സ്വകാര്യ ആശുപത്രിയിലേക്ക് മാറ്റി. ഉച്ചക്ക് 12.30ന് ഉമ്മറിൻ്റെ മരണം സ്ഥിരീകരിച്ചു.
