മലപ്പുറം: ഇല ഫൗണ്ടേഷന്‍റെ ആഭിമുഖ്യത്തിൽ മിയാവാക്കി വനവൽക്കരണ പരിപാടികൾക്ക് ജില്ലയിൽ തുടക്കമായി. പ്രദേശത്തെ രണ്ടോ മൂന്നോ സെന്‍റ് വ്യാപ്തിയിൽ ജൈവ മിശ്രിത പ്രവർത്തനങ്ങളിലൂടെ മണ്ണൊരുക്കി ജലസംരക്ഷണത്തിന് ഉതകുന്ന രീതിയിലുള്ള മരം വെച്ചു പിടിപ്പിക്കുന്ന പദ്ധതിയാണ് മിയോ വാക്കി വനവൽക്കരണം. ജപ്പാനിൽ നിന്നാണ് ഈ പദ്ധതിക്ക് തുടക്കമായത്. കോഴിക്കോട് ജില്ലയിൽ അഞ്ചിടങ്ങളിലായി ഈ പദ്ധതി വിജയം കണ്ടതിനെ തുടർന്നാണ് ജില്ലയിൽ പദ്ധതിക്ക് തുടക്കമാകുന്നത്.
ഇല ഫൗണ്ടേഷൻ കീഴിലുള്ള ചെല്ലൂർ പ്രദേശത്തെ രണ്ടേക്കർ ഭൂമിയിലാണ് പദ്ധതിക്ക് തുടക്കമായത്. ഈ പദ്ധതി വ്യാപകമായി നടപ്പിലാക്കാനായുള്ള പ്രവർത്തനങ്ങൾക്ക് ഇല ഫൗണ്ടേഷൻ രൂപം കൊടുക്കും. വെള്ള കുറവുള്ള പ്രദേശങ്ങളിൽ ഈ പദ്ധതി ഏറെ ഗുണകരമാകുമെന്നും ജൈവ വൈവിധ്യം തിരിച്ചു പിടിക്കുന്നതിനും ഔഷധ ഫലവൃക്ഷ പരിപാലനങ്ങൾക്കും ഈ പദ്ധതി സഹായകരമാകുമെന്നും പ്രമുഖ പരിസ്ഥിതി പ്രവർത്തകനും ഹരിത സേന ജില്ലാ കോ ഓഡിനേറ്ററുമായ ഹാമിദലി വാഴക്കാട് വിശദീകരിച്ചു.
