മലപ്പുറം: മലപ്പുറം ഗവ. കോളജിൽ ഗ്രീൻ കാംപസ് ക്ലീൻ കാംപസ് പദ്ധതിക്ക് തുടക്കമായി. ജനകീയാസൂത്രണ മിഷൻ ജില്ലാ കോർഡിനേറ്റർ ശ്രീധരൻ ഉദ്ഘാടനം ചെയ്തു. പ്രിൻസിപ്പൽ ഡോ. കെകെ ദാമോദരൻ അധ്യക്ഷത വഹിച്ചു. പദ്ധതിയുടെ ഒന്നാം ഘട്ടമെന്ന് നിലയില്‍ ഗ്രീൻ പ്രോട്ടോകോൾ പദ്ധതി വിശദീകരണ ക്ലാസും മാലിന്യം തരംതിരിച്ച് പാക്ക് ചെയ്യുന്നതിൽ പ്രായോഗിക പരിശീലനവും സംഘടിപ്പിച്ചു. 100 എൻ.എസ്.എസ് വളണ്ടിയർമാർ പ്രായോഗിക പരിശീലന പരിപാടിയുടെ ഭാഗമായി. ഹരിത കർമ്മ സേനാ പ്രസിഡന്റ് എ സുജിതയുടെ നേതൃത്വത്തിലായിരുന്നു പരിശീലനം.
പദ്ധതിയുടെ ആദ്യ പടിയായി കാംപസിലെ പൊതുപരിപാടികളിലും സെമിനാറുകളിലും ഡിസ്പോസബിൾ ഗ്ലാസ്സുകളുടെയും പ്ലെയ്റ്റുകളുടെയും ഉപയോഗം നിർത്തലാക്കി. പകരം എല്ലാ ഡിപ്പാർട്ടുമെന്റുകളും സംയുക്തമായി 300 സ്റ്റീൽ ഗ്ലാസുകളും പ്ലെയിറ്റുകളും എൻ.എസ്.എസിന് സംഭാവനയായി നൽകി. പൊതു പരിപാടികൾക്ക് എൻ.എസ്.എസ്. വളണ്ടിയർമാർ സ്റ്റീൽ പാത്രങ്ങൾ വിതരണം ചെയ്യും. പദ്ധതിയുടെ ഭാഗമായി ഔഷധോദ്യാന നിർമ്മാണം, ബട്ടർഫ്ലൈ ഗാർഡൻ, പ്ലാസ്റ്റിക് ബോട്ടിലുകൾ ശേഖരിച്ച് ഇരിപ്പിടങ്ങൾ തയ്യാറാക്കൽ, ചുമർ ചിത്ര രചന തുടങ്ങിയവയും സംഘടിപ്പിക്കും
