വടകരയില്‍ പി ജയരാജനെതിരെ ആർഎംപി നേതാവും ടി പി ചന്ദ്രശേഖരന്‍റെ ഭാര്യയുമായ കെ കെ രമയെ സ്ഥാനാർഥിയാക്കണമെന്ന് മുസ്ലീം ലീഗ് എംഎല്‍എ കെ എം ഷാജി. 'വടകരയില്‍ ഇരയും വേട്ടക്കാരനും തമ്മിലാകുമോ അങ്കം' എന്ന പേരില്‍ ഫേസ്ബുക്കിലിട്ട പോസ്റ്റിലാണ് ഷാജിയുടെ പ്രതികരണം. ലോക്സഭാ സീറ്റുകളിലേക്ക് യുഡിഎഫ് സ്ഥാനാർഥികളെ നിശ്ചയിക്കാനുള്ള ചർച്ചകൾ തുടരുന്നതിനിടെയാണ് ഷാജിയുടെ ഫേസ്ബുക്ക് പോസ്റ്റ്.
രാഷ്ട്രീയ കൊലപാതകങ്ങൾ കേരളമൊട്ടാകെ പ്രതിഫലിക്കുമ്പോൾ, അതിന്റെ ഏറ്റവും വലിയ ജീവിക്കുന്ന ഇരയായ കെ കെ രമയെക്കാൾ രക്തക്കൊതിയന്മാരെ വിറളിപിടിപ്പിക്കാൻ മറ്റാർക്ക് കഴിയുമെന്നും ഷാജി ചോദിക്കുന്നു. 51 വെട്ട് വെട്ടാൻ ഉപയോഗിച്ച വാൾത്തലയെക്കാൾ ശക്തമാണ് ജനാധിപത്യത്തിലെ ഓരോ വോട്ടുമെന്നും ഷാജി പറയുന്നു.
ജനാധിപത്യത്തില്‍ വിശ്വാസമില്ലാത്ത വേട്ടക്കാർക്ക് അത് മനസിലാക്കി കൊടുക്കാൻ രമയെ സ്ഥാനാർഥിയാക്കണമെന്നും ഷാജി ആവശ്യപ്പെട്ടു. ഇക്കാര്യത്തില്‍ അന്തിമ തീരുമാനം പ്രഖ്യാപിക്കേണ്ടത് കോണ്‍ഗ്രസാണെന്നും, അതിന് വേണ്ടി കാത്തിരിക്കുന്നു എന്ന അടിക്കുറിപ്പോടെയാണ് ഷാജി പോസ്റ്റ് അവസാനിപ്പിക്കുന്നത്.
- " class="align-text-top noRightClick twitterSection" data="">
