കോഴിക്കോട്: മുട്ടിൽ മരംമുറിക്കേസിൽ വനം വകുപ്പിൻ്റെ അന്വേഷണം പൂർത്തിയായി. വകുപ്പുതല അന്വേഷണ റിപ്പോർട്ട് മന്ത്രിക്ക് ഉടൻ കൈമാറും. അഞ്ച് സംഘങ്ങളായി തിരിഞ്ഞാണ് അന്വേഷണം നടത്തിയത്.
സംഭവത്തിൽ റവന്യൂ - വനംവകുപ്പ് ഉദ്യോഗസ്ഥർക്ക് വീഴ്ച പറ്റിയെന്ന് വനം വകുപ്പ് സെക്രട്ടറി പ്രാഥമിക റിപ്പോർട്ട് നൽകിയിരുന്നു. ആരോപണ വിധേയരായ ഉദ്യോഗസ്ഥർക്കെതിരെ ഉടൻ നടപടിയുണ്ടാകില്ലെന്നാണ് വനംമന്ത്രി എ.കെ.ശശീന്ദ്രൻ അന്ന് പ്രതികരിച്ചത്. അതേസമയം വനംകൊള്ളയിലെ ക്രൈംബ്രാഞ്ച് അന്വേഷണം തുടരുകയാണ്.
അന്വേഷണം മുറുകുന്നതിനിടെ വനംവകുപ്പില്‍ വലിയ തരത്തിലുള്ള അസ്വാരസ്യങ്ങളും ചേരിതിരിവും തുടരുകയാണ്. മരം മുറി നടന്നത് റവന്യൂ ഭൂമിയിലാണെന്നും വനം വകുപ്പ് ഉദ്യോഗസ്ഥരെ ബലിയാടാക്കരുതെന്നും ആവശ്യപ്പെട്ട് ഫോറസ്റ്റ് പ്രൊട്ടക്ടീവ് സ്റ്റാഫ് അസോസിയേഷന്‍ വനം മന്ത്രിക്ക് നിവേദനം നൽകിയിരുന്നു.
ALSO READ മുട്ടില്‍ വനംകൊള്ള: നിലമ്പൂരിലും പ്രത്യേക അന്വേഷണസംഘമെത്തി
കേസുകളും ബാധ്യതകളും വനം ഫീല്‍ഡ് ജീവനക്കാരുടെ തലയില്‍ കെട്ടിവെക്കാനുള്ള ശ്രമത്തില്‍ പ്രതിഷേധിച്ചായിരുന്നു നിവേദനം സമര്‍പ്പിച്ചത്. വനംവകുപ്പിലെ റേഞ്ച് ഓഫീസറിന് താഴെയുള്ള 5000ത്തോളം വരുന്ന ഫീല്‍ഡ് വിഭാഗം ജീവനക്കാരാണ് പ്രതിഷേധവുമായി രംഗത്തെത്തിയിട്ടുള്ളത്.
മരം കൊണ്ടുപോകാനുള്ള പാസ് നല്‍കാനുള്ള ഉത്തരവാദിത്തത്തിന്‍റെ പേരില്‍ കേസെടുക്കാനുള്ള നീക്കം അനുവദിക്കില്ലെന്നും അസോസിയേഷന്‍ നിവേദനത്തിലൂടെ ആവശ്യപ്പെടുന്നു. മരംമുറിച്ചതില്‍ സര്‍ക്കാരിനുണ്ടായ നഷ്ടം ഫീല്‍ഡ് വിഭാഗം ജീവനക്കാരുടെ തലയില്‍ കെട്ടിവെക്കാനുള്ള നീക്കം ഉപേക്ഷിക്കണമെന്നും അസോസിയേഷന്‍ ആവശ്യപ്പെട്ടു.
