കോഴിക്കോട് : പാലാ ബിഷപ്പ് ജോസഫ് കല്ലറങ്ങാട്ടിന്‍റെ വിവാദമായ നാർക്കോട്ടിക് ജിഹാദ് പരാമർശം പിൻവലിക്കണമെന്ന് ആവശ്യപ്പെട്ട് വിവിധ മുസ്ലിം സംഘടനകൾ രംഗത്ത്. സഭയുടെ തലപ്പത്തുള്ള ഒരു മതനേതാവ് ഇത്തരത്തിൽ അപക്വമായ പ്രസ്‌താവനകൾ നടത്താൻ പാടില്ലെന്ന് ഇന്ത്യൻ യൂണിയൻ മുസ്ലിം ലീഗ് നേതാവ് പാണക്കാട് സാദിഖ് അലി ശിഹാബ് തങ്ങൾ പറഞ്ഞു.
മുസ്ലിം സംഘടനകളുടെ യോഗത്തിനുശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. പാലാ ബിഷപ്പ് പ്രസ്‌താവനയിലൂടെ മുസ്ലിം സമുദായത്തെയാണ് ലക്ഷ്യം വയ്‌ക്കുന്നത്. ഇത്തരം പരാമർശങ്ങൾ നടത്തുന്നത് സാമുദായിക ഐക്യവും മതേതരത്വവും ഇല്ലാതാക്കും. വിഷയത്തിൽ സർക്കാർ ഫലപ്രദമായ ഇടപെടൽ നടത്തണമെന്നും അദ്ദേഹം ആവശ്യപ്പെട്ടു.
പ്രശ്‌നം ചർച്ച ചെയ്യാൻ സർവകക്ഷിയോഗം വിളിക്കണമെന്നാണ് ആവശ്യം. അതേസമയം ഒരു മുസ്ലിം സംഘടനയും ബിഷപ്പിന്‍റെ പരാമർശത്തിൽ അപക്വമായ പ്രതികരണം നടത്തിയിട്ടില്ലെന്നും അദ്ദേഹം കൂട്ടിച്ചേർത്തു. 13 മുസ്ലിം സംഘടനകൾ യോഗത്തിൽ പങ്കെടുത്തു.
ALSO READ:നാർക്കോട്ടിക് ജിഹാദ് വിവാദം; തലസ്ഥാനത്ത് സാമുദായിക നേതാക്കളുടെ യോഗം
പാലാ ബിഷപ്പിന്‍റെ വിവാദ പരാമർശത്തിന് പിന്നാലെ വിവിധ മത സംഘടനാനേതാക്കൾ തിങ്കളാഴ്‌ച തിരുവനന്തപുരത്ത് യോഗം ചേർന്നിരുന്നു. കേരള സമൂഹത്തിന്‍റെ മതേതര ഘടന ശക്തിപ്പെടുത്തുന്നതിനുള്ള നടപടികൾ സ്വീകരിക്കണമെന്ന് യോഗം ആവശ്യപ്പെട്ടു.
സിറോ മലങ്കര കത്തോലിക്കാ സഭ കർദിനാൾ ബസേലിയോസ് ക്ലീമിസ് ബാവ വിളിച്ചുചേർത്ത യോഗത്തിൽ മുസ്ലിം യൂത്ത് ലീഗ് നേതാവ് പാണക്കാട് സയ്യിദ് മുനവര്‍ അലി ശിഹാബ് തങ്ങൾ, ശാന്തിഗിരി ആശ്രമത്തിലെ സ്വാമി ഗുരുരത്നം ജ്ഞാന തപസ്വി, സിറോ മലബാർ സഭ ഒഴികെയുള്ള മറ്റ് മത സംവിധാനങ്ങളുടെ പ്രതിനിധികൾ എന്നിവർ പങ്കെടുത്തിരുന്നു.
