കോഴിക്കോട്: കേരള വഖഫ് ബോർഡ് ചെയർമാനായി പി.എസ്.സി മുൻ ചെയർമാൻ അഡ്വ. എം.കെ. സക്കീറിനെ നിയമിക്കാനുള്ള സർക്കാർ തീരുമാനത്തെ കൂട്ടായി എതിർക്കാൻ സമസ്ത. സക്കീറിനെ നിയമിക്കുന്നതിനെതിരെ സമസ്ത മുഷാവറ അംഗം ബഹാവുദ്ദീൻ നദ്‌വി പരസ്യമായി രംഗത്തെത്തിയിരുന്നു. മതബോധമില്ലാത്തയാളെ ചെയർമാനാക്കുന്നത് വിശ്വാസികളെ അപഹസിക്കലാണെന്ന് അദ്ദേഹം ഫെയ്‌സ്ബുക്കിൽ കുറിച്ചു.
ബഹാവുദ്ദീൻ നദ്‌വിയുടെ നിലപാട്: പൊതുവെ ഇസ്‌ലാമിക നിയമ സംഹിതകളും പ്രമാണങ്ങളും സംബന്ധിച്ചും വഖഫ് നിയമങ്ങളെക്കുറിച്ചുള്ള സവിശേഷമായും കൃത്യമായും പരിജ്ഞാനമുള്ളവര്‍ക്കായിരിക്കണം വഖഫ് ചുമതലകള്‍ ഏല്‍പിക്കപ്പെടേണ്ടത്.
മത വിഷയങ്ങളില്‍ അറിവും കാഴ്ചപ്പാടും ഇസ്‌ലാമിക ജീവിത രീതികളുമുള്ള വ്യക്തികള്‍ വഹിച്ചിരുന്ന കേരളത്തിലെ വഖഫ് ചെയര്‍മാന്‍ പദവിയില്‍ മതവിശ്വാസികളാല്ലത്തവരെയും ദൈവത്തെ തള്ളിപ്പറയുന്നവരെയും നിയമിക്കാന്‍ ഇടതുപക്ഷ സര്‍ക്കാര്‍ പ്രത്യേകം താത്പര്യം കാണിക്കുന്നതിനു പിന്നിലെ അജണ്ട വ്യക്തമാണ്. ഇടതുമുന്നണി നടത്തുന്നത് സമുദായ വഞ്ചനയാണെന്നും അദ്ദേഹം പരാമര്‍ശിച്ചു.
സമസ്തയിലെ ഇടത് അനുകൂലകരുടെ നീക്കത്തെ എന്നും ശക്തമായി എതിർക്കുന്ന വ്യക്തിയാണ് ബഹാവുദ്ദീൻ നദ്‌വി എന്നാൽ പിണറായി വിജയൻ സർക്കാരിനോട് അടുപ്പം പുലർത്തുന്ന സമസ്തയിലെ മുഷാവറ അംഗങ്ങളും സക്കീറിനെ നിയമിക്കുന്നതിൽ എതിര്‍പ്പ് പ്രകടിപ്പിച്ചത് ശ്രദ്ധേയമാണ്. മതവിശ്വാസിയല്ലാത്ത മതാചാരം അനുവർത്തിക്കാത്ത ഒരു വ്യക്തിക്ക് ആ പദവിയിൽ ഇരിക്കാൻ അർഹതയില്ലെന്ന സമസ്തയുടെ നിലപാട് വരും ദിവസങ്ങളില്‍ കൂടുതല്‍ ചർച്ചകൾക്ക് വഴിതെളിക്കുമെന്നുറപ്പാണ്.
വഖഫ് ബോർഡ് ചെയർമാൻ തെരഞ്ഞെടുപ്പ്: ടി.കെ. ഹംസ രാജിവെച്ച ഒഴിവിലാണ് വഖഫ് ബോർഡ് ചെയർമാൻ തെരഞ്ഞെടുപ്പ് നടക്കുന്നത്. 2016 ലാണ് പൊന്നാനി പെരുമ്പടപ്പ് സ്വദേശിയായ സക്കീർ പി.എസ്.സി ചെയർമാനായി നിയമിക്കപ്പെട്ടത്. മുംബൈ ഗവ. ലോ കോളജിൽ നിന്ന് എൽ.എൽ.ബി ബിരുദവും തിരുവനന്തപുരം ഗവ. ലോ കോളജിൽനിന്ന് ബിരുദാനന്തര ബിരുദവും നേടി. 1990ൽ തൃശൂർ ബാറിൽ അഭിഭാഷകനായി പ്രവർത്തനമാരംഭിച്ചു. 2006-11 കാലയളവിൽ തൃശൂർ കോടതിയിൽ ഗവ. പ്ലീഡറായും പബ്ലിക് പ്രോസിക്യൂട്ടറുമായും പ്രവർത്തിച്ചു.
ഒന്നര വർഷം കാലാവധി ബാക്കിനിൽക്കെ ആഗസ്റ്റ് ഒന്നിനാണ് വഖഫ് ബോർഡ് ചെയർമാൻ സ്ഥാനം ടി.കെ ഹംസ രാജിവച്ചത്. ആസൂത്രിത നീക്കത്തിന് പിന്നാലെയാണ് ടികെ ഹംസ സ്ഥാനമൊഴിയുന്നത് എന്നാണ് പുറത്ത് വന്നിരുന്ന വിവരം. മന്ത്രി വി. അബ്ദുറഹ്മാനുമായുള്ള അഭിപ്രായ ഭിന്നതയാണു രാജിയിൽ കലാശിച്ചതെന്ന് റിപ്പോർട്ടുകളുണ്ടായിരുന്നു.
എന്നാൽ പ്രായാധിക്യം മൂലമാണ് പദവി ഒഴിയുന്നതെന്നാണ് ടി.കെ ഹംസ വ്യക്തമാക്കിയത്. 80 വയസ് കഴിഞ്ഞവർ പദവികളിൽ നിന്നും മാറി നിൽക്കണമെന്നാണ് സിപിഎം നയം. എന്നാൽ തനിക്ക് പാർട്ടി ഇളവ് നൽകി 85 വയസു വരെ ആയിരുന്നു. അത് ഇപ്പോൾ വയസ് 86 കഴിഞ്ഞു ഇനിയും പദവിയിൽ തുടർന്നാൽ വഴിയിൽ വീണുപോകുമെന്നും ടികെ ഹംസ വ്യക്തമാക്കിയിരുന്നു.
