കോഴിക്കോട്: മാല മോഷണ കേസില്‍ പിടിയിലായ നാടോടി സ്‌ത്രീകളിലൂടെ തമിഴ്‌നാട്ടുകാരായ ഒരു സംഘം മോഷ്‌ടാക്കളെ പിടികൂടി പൊലീസ്. പിടിയിലായ മോഷ്‌ടാക്കള്‍ വിവിധ പൊലീസ് സ്റ്റേഷനുകളില്‍ ഒന്നിലധികം കേസുകളില്‍ പ്രതികളാണെന്ന് സിറ്റി പൊലീസ് കമ്മിഷണര്‍ രാജ്‌പാല്‍ മീണ പറഞ്ഞു. പിടികൂടിയ സംഘത്തില്‍ ഇനിയും ആളുകളുണ്ടാകുമെന്നും അവരെ കണ്ടെത്തുന്നതിനായി അന്വേഷണം പുരോഗമിക്കുകയാണെന്നും കമ്മിഷണര്‍ വ്യക്തമാക്കി.
ഇന്ന് രാവിലെ കോഴിക്കോട് ബസ് സ്റ്റാന്‍റില്‍ നിന്നാണ് സുധയെന്ന വീട്ടമ്മയുടെ മാല തമിഴ്‌നാട് സ്വദേശിനി കവര്‍ന്നത്. സംഭവത്തെ തുടര്‍ന്ന് വീട്ടമ്മ മോഷ്‌ടാവിനെ കീഴ്‌പ്പെടുത്തി. യുവതിയേയും ഇവര്‍ക്കൊപ്പമുണ്ടായിരുന്ന മറ്റ് രണ്ട് പേരെയും പൊലീസില്‍ ഏല്‍പ്പിച്ചു. തുടര്‍ന്ന് നടത്തിയ അന്വേഷണത്തിലാണ് മോഷ്‌ടാക്കളെ കുറിച്ച് വിവരം ലഭിച്ചത്.
മൊബൈല്‍ ഫോണുകളും പെന്‍ഡ്രൈവുകളും സ്വര്‍ണാഭരണങ്ങളും പണവും സംഘത്തില്‍ നിന്ന് കണ്ടെത്തി. വിഷയത്തില്‍ അന്വേഷണം പുരോഗമിക്കുകയാണെന്ന് കമ്മിഷണര്‍ അറിയിച്ചു.
