കോഴിക്കോട്: 50 കിലോ കഞ്ചാവുകടത്തിയ കേസില്‍ പ്രതികള്‍ക്ക് 15 വര്‍ഷം കഠിനതടവും പിഴയും. ആന്ധ്രപ്രദേശില്‍ നിന്നും കേരളത്തിലേക്ക് കഞ്ചാവ് കടത്തി പിടിയിലായ അടിമാലി സ്വദേശികളായ മൈലാടിയില്‍ അഫ്സല്‍(25), കുപ്പശ്ശേരി ധനീഷ് (30) എന്നിവരെയാണ് വടകര എന്‍.ഡി.പി.എസ് കോടതി ശിക്ഷിച്ചത്. പിഴയടച്ചില്ലെങ്കില്‍ ഒരു വര്‍ഷം കൂടി ശിക്ഷയനുഭവിക്കേണ്ടി വരും.
2018 ഓഗസ്റ്റ് മൂന്നിനായിരുന്നു മുക്കം പൊലീസും ജില്ലാ ലഹരിവിരുദ്ധ സ്‌ക്വാഡും ചേര്‍ന്ന് മുക്കം-അരീക്കോട് സംസ്ഥാനപാതയില്‍ പ്രതികളെ അറസ്റ്റ് ചെയ്തത്. കാറിന്‍റെ ഡിക്കിയില്‍ രണ്ട് പ്ലാസ്റ്റിക് ചാക്കുകളിലായി സൂക്ഷിച്ച നിലയിലായിരുന്നു കഞ്ചാവ്. ആന്ധ്രാപ്രദേശിലെ വിശാഖപട്ടണത്തിനടുത്തുള്ള അറക്കയിൽ നിന്നാണ് പ്രതികള്‍ കഞ്ചാവ് കടത്തി കൊണ്ടുവന്നത്. കേരളത്തിലെയും കർണാടകയിലെയും ബൈരക്കുപ്പയിലെയും മൊത്തവിതരണക്കാര്‍ക്ക് കൊണ്ടുവന്നതാണ് കഞ്ചാവെന്ന് പ്രതികൾ പൊലീസിന് മൊഴി നൽകിയിരുന്നു.
