കോട്ടയം മീനടത്ത് വൃദ്ധ മാതാവിനെ മർദിച്ച മകൻ അറസ്റ്റിൽ ; ആക്രമിക്കുന്ന ദൃശ്യം പുറത്ത്

പലപ്പോഴായി നാട്ടുകാർ ഇടപെട്ടിട്ടും കൊച്ചുമോൻ ക്രൂരത തുടർന്ന സാഹചര്യത്തിൽ ഇയാളുടെ ഭാര്യ ദൃശ്യങ്ങൾ മൊബൈലിൽ പകർത്തുകയായിരുന്നു

കോട്ടയം : മീനടത്ത് വൃദ്ധ മാതാവിനെ മർദിച്ച മകൻ അറസ്റ്റിൽ. മീനടം മാത്തുർപ്പടി തെക്കേൽ കൊച്ചുമോനെ(48) ആണ് പാമ്പാടി പൊലീസ്‌ അറസ്‌റ്റ് ചെയ്‌തത്. മദ്യത്തിന് അടിമയായ കൊച്ചുമോൻ വീട്ടിലെത്തി സ്ഥിരമായി മാതാവിനെ ക്രൂരമായി മർദിക്കാറുണ്ടായിരുന്നു.

നാട്ടുകാർ ഇടപെട്ടിട്ടും ഇയാൾ മർദനം തുടർന്നുകൊണ്ടിരുന്നു. ബുധനാഴ്‌ച വീണ്ടും മാതാവിനെ മർദിക്കുന്ന സമയത്ത് കൊച്ചുമോൻ്റെ ഭാര്യ ദൃശ്യങ്ങൾ ഫോണിൽ പകർത്തി വാർഡ് മെമ്പർക്കും മറ്റുള്ളവർക്കും അയയ്‌ക്കുകയായിരുന്നു. ദൃശ്യങ്ങളുടെ അടിസ്ഥാനത്തിലാണ് പൊലീസ് കേസെടുത്തത്.