കോട്ടയം: യുഡിഎഫ് സ്ഥാനാർഥിക്കെതിരെ മുന്‍ ഡിസിസി അംഗവും എന്‍സിപി നേതാവുമായ സാബു എബ്രാഹം. കഴിഞ്ഞ തദ്ദേശസ്വയംഭരണ തെരഞ്ഞെടുപ്പില്‍ പാലാ മുനിസിപ്പാലിറ്റിയിലും പഞ്ചായത്തുകളിലും കോണ്‍ഗ്രസിനെ തകര്‍ക്കാന്‍ നേതൃത്വം കൊടുത്തയാളാണ് യുഡിഎഫിന്‍റെ സ്വതന്ത്ര സ്ഥാനാർഥി. ഇത് യഥാർഥ കോണ്‍ഗ്രസുകാര്‍ തിരിച്ചറിയണമെന്ന് സാബു എബ്രാഹം പറഞ്ഞു.
2015ലെ മുനിസിപ്പല്‍ തെരഞ്ഞെടുപ്പിലാണ് കോണ്‍ഗ്രസിനെ തകര്‍ക്കുന്ന വിവാദ കരാര്‍ തയ്യാറാക്കിയത്. കരാര്‍ പ്രകാരം കോണ്ഗ്രസിന്റെ സിറ്റിംഗ് സീറ്റുകള്‍ വരാനിരിക്കുന്ന 2020ലെ തെരഞ്ഞെടുപ്പില്‍ കോണ്‍ഗ്രസ് ചോദിക്കില്ലാ എന്ന് മുന്‍കൂറായി എഴുതി തയ്യാറാക്കിയത് ഇപ്പോഴത്തെ യുഡിഎഫ് സ്വതന്ത്ര സ്ഥാനാർഥിയാണെന്ന് സാബു എബ്രഹം ചൂണ്ടിക്കാട്ടി. അതില്‍ കൈപ്പടയും സാക്ഷിയും എന്നെഴുതി ഒപ്പിട്ടിരിക്കുന്നത് കേരളാ കോണ്‍ഗ്രസ് സംസ്ഥാന ജനറല്‍ സെക്രട്ടറി കൂടിയായ ജോസ് ടോമാണെന്നും കരാറിന്റെ പകര്‍പ്പ് പുറത്തുവിട്ട് സാബു എബ്രാഹം പറഞ്ഞു.
കോണ്‍ഗ്രസിനെ എക്കാലത്തും പിന്നില്‍ നിന്നും കുത്തി അപമാനിക്കുന്നതാണ് കേരളാ കോണ്ഗ്രസിന്റെ നയം. പാലായില്‍ എല്‍ഡിഎഫും സ്വതന്ത്രന്മാരും തമ്മിലാണ് മത്സരം നടക്കുന്നതെന്നും സാബു പറഞ്ഞു.
