കോട്ടയം: കോട്ടയം സംക്രാന്തിക്കടുത്ത് അടിച്ചിറയില്‍ റിട്ടയേഡ് പൊലീസ് ഉദ്യോഗസ്ഥനെ റോഡ് സൈഡിൽ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തി. ആറ് വർഷം മുമ്പ് കോട്ടയം ഗാന്ധിനഗർ പൊലീസ് സ്റ്റേഷനിൽ നിന്നും എസ്.ഐ ആയി വിരമിച്ച കണ്ണാംമ്പറത്തിൽ ശശിധരനാണ് മരിച്ചത്. പുലർച്ചെ അഞ്ചു മണിയോടെ വീട്ടിൽ നിന്നും നടക്കാനിറങ്ങിയ ശശിധരനെ പിന്നീട് റോഡ് സൈഡിൽ മരിച്ച നിലയിൽ കണ്ടെത്തുകയായിരുന്നു. പുലർച്ചെ പള്ളിയിൽ പോകാനെത്തിയവരാണ് മൃതദേഹം ആദ്യം കാണുന്നത്. മുഖമാകെ രക്തം വ്യാപിച്ചിരുന്ന നിലയിലായിരുന്നു മൃതദേഹമെന്നും ഇവർ പറയുന്നു.
ഗന്ധിനഗർ പൊലീസിൽ വിവരമറിയിച്ചതിനെ തുടർന്ന് ഉദ്യോഗസ്ഥർ സ്ഥലത്തെത്തി മൃതദേഹം കോട്ടയം മെഡിക്കൽ കോളെജ് ആശുപത്രിയിലേക്ക് മാറ്റി. തിങ്കളാഴ്ച്ച പുലർച്ചെ അയർലെൻഡിലെ മക്കളുടെ അടുത്തേക്ക് പോകാനിരിക്കെയായിരുന്നു മരണം. ഇയാളുടെ തലയുടെ പിൻഭാഗത്തും താടിയെല്ലിനോടും ചേർന്നും മുറിവുകൾ ഉള്ളതായാണ് സൂചന. സംഭവവുമായി ബന്ധപ്പെട്ട് സമീപവാസിയായ യുവാവിനെ പൊലീസ് കസ്റ്റഡിയിലെടുത്തിട്ടുണ്ട്.
