കോട്ടയം : പുതുപ്പള്ളിയിൽ ചാണ്ടി ഉമ്മൻ തരംഗം.വോട്ടെണ്ണിത്തുടങ്ങിയതുമുതല്‍ ആധികാരിക മുന്നേറ്റമായിരുന്നു യുഡിഎഫ് സ്ഥാനാര്‍ഥിയുടേത്. ഒരിക്കല്‍പ്പോലും ജെയ്‌ക് സി തോമസിന് മുന്നിലെത്താനായില്ല. ആദ്യ മിനിട്ടുമുതല്‍ ഏകപക്ഷീയമായ കുതിപ്പായിരുന്നു യുഡിഎഫ് ക്യാപിന്‍റേത്. ഓരോ റൗണ്ട് പിന്നിടുമ്പോഴും ചാണ്ടി ഉമ്മന്‍റെ ഭൂരിപക്ഷം ചരിത്രത്തിലില്ലാത്തവിധം കൂടിക്കൊണ്ടിരുന്നു.(Puthuppally Bypoll Results Latest Updates )
ചാണ്ടി ഉമ്മന്‍റെ മുന്നേറ്റം പുതുപ്പള്ളിയുടെ ചരിത്രത്തിലെ ഏറ്റവും ഉയർന്ന ഭൂരിപക്ഷത്തിലേക്കാണ് എത്തി നിന്നത്. 2021ൽ പുതുപ്പള്ളിയിൽ ഉമ്മൻ ചാണ്ടിക്ക് 9044 വോട്ടിന്‍റെ ലീഡാണ് ഉണ്ടായിരുന്നത്. 2016 ലെ തെരഞ്ഞെടുപ്പിലാണ് മണ്ഡലത്തിലെ ഏറ്റവും ഉയര്‍ന്ന ഭൂരിപക്ഷമായ 27,092 കുറിക്കപ്പെട്ടത്. ഇതും മറികടന്നുള്ള മുന്നേറ്റമായിരുന്നു ചാണ്ടി ഉമ്മന്‍റേത് യുഡിഎഫ് നേതാക്കളും പ്രവര്‍ത്തകരും ആഹ്ളാദ നിറവിലാണ്. സഹതാപതരംഗവും ഭരണവിരുദ്ധവികാരവും അലയടിച്ച തെരഞ്ഞെടുപ്പില്‍ എല്‍ഡിഎഫിന് അടിതെറ്റി. ബിജെപി ചിത്രത്തിലില്ലാതെയുമായി.
കോട്ടയം ബസേലിയസ് കോളജിൽ രാവിലെ 8.10ഓടെയാണ് വോട്ടെണ്ണൽ ആരംഭിച്ചത്. എട്ട് മണിയോടെ വോട്ടെണ്ണൽ ആരംഭിക്കാനാണ് നിശ്ചയിച്ചിരിക്കുന്നതെങ്കിലും സ്‌ട്രോങ് റൂമിന്‍റെ താക്കോൽ മാറിയതോടെ വൈകുകയായിരുന്നു. 53 വർഷം പുതുപ്പള്ളി നിയോജക മണ്ഡലത്തെ പ്രതിനിധീകരിച്ച ഉമ്മൻ ചാണ്ടിയുടെ വേർപാടിന് പിന്നാലെയാണ് ഉപതെരഞ്ഞെടുപ്പ് നടന്നത്.
പിതാവിന്‍റെ പാതയില്‍ പിന്തുടര്‍ച്ചയുമായി ചാണ്ടി ഉമ്മനും വികസനമുദ്രാവാക്യമുയര്‍ത്തി ജെയ്‌ക് സി തോമസും വോട്ടുയര്‍ത്താമെന്ന പ്രതീക്ഷയോടെ എൻഡിഎ സ്ഥാനാർഥി ലിജിൻ ലാലുമായിരുന്നു കളത്തിലിറങ്ങിയത്. പുതുപ്പള്ളിയെ മൊത്തത്തിൽ ഇളക്കിമറിച്ചുള്ള പ്രചാരണങ്ങളായിരുന്നു തെരഞ്ഞെടുപ്പിന് മുന്നോടിയായി നടന്നത്. സെപ്റ്റംബർ 5നായിരുന്നു തെരഞ്ഞെടുപ്പ്.
മത്സരരംഗത്ത് ഉണ്ടായിരുന്നത് ഏഴ് സ്ഥാനാർഥികളായിരുന്നു. എഎപി സ്ഥാനാർഥി ലൂക്ക് തോമസ്, സ്വതന്ത്ര സ്ഥാനാർഥിയായ പി കെ ദേവദാസ്, സ്വതന്ത്ര സ്ഥാനാർഥിയായ ഷാജി, സ്വതന്ത്ര സ്ഥാനാർഥിയായ സന്തോഷ് ജോസഫ് (സന്തോഷ് പുളിക്കൽ) എന്നിവരാണ് മറ്റ് സ്ഥാനാർഥികൾ.
1,76,417 വോട്ടര്‍മാരാണ് പുതുപ്പള്ളി നിയോജക മണ്ഡലത്തില്‍ ആകെയുള്ളത്. ഇതിൽ ഭൂരിഭാഗവും വനിത വോട്ടര്‍മാരാണ്. 90,281 വനിത വോട്ടര്‍മാരും 86,132 പുരുഷ വോട്ടര്‍മാരും, നാല് ട്രാന്‍സ്‌ ജെന്‍ഡര്‍മാരുമാണ് പുതുപ്പള്ളിയിൽ ഉണ്ടായിരുന്നത്. ഇതിൽ 1,28,535 പേരാണ് വോട്ട് ചെയ്യാൻ ഇത്തവണ എത്തിയത്. 72.86 ശതമാനം പേർ ഇത്തവണ വോട്ട് ചെയ്‌തെന്നാണ് കണക്ക്.
ആകെയുള്ള 2,456 പോസ്റ്റൽ വോട്ടുകൾ എണ്ണിക്കഴിഞ്ഞപ്പോൾ ചാണ്ടി ഉമ്മന്‍റെ ലീഡ് 1000 കടന്നിരുന്നു. ആകെ വോട്ട് ചെയ്‌ത 2491 അസന്നിഹിതരുടെ വോട്ടുകളിൽ 151 വോട്ടിന്‍റെ ലീഡും ചാണ്ടി ഉമ്മൻ നേടി. വോട്ടിങ് മെഷീനിലെ വോട്ട് എണ്ണിത്തുടങ്ങിയപ്പോഴേക്കും ലീഡ് നില കുതിച്ചുയരുകയായിരുന്നു.
ആദ്യം വോട്ടെണ്ണിയ അയർക്കുന്നം പഞ്ചായത്ത് എണ്ണിക്കഴിഞ്ഞപ്പോൾ തന്നെ ചാണ്ടി ഉമ്മന്‍റെ ഭൂരിപക്ഷം അയ്യായിരത്തിന് മുകളിൽ എത്തിയിരുന്നു. 2021ലെ നിയമസഭ തെരഞ്ഞെടുപ്പിൽ ഉമ്മന് ചാണ്ടി അയർക്കുന്നത്ത് നേടിയത് ആയിരത്തോളം വോട്ടുകളായിരുന്നു. എന്നാല്‍ ആ കണക്കുകളെയെല്ലാം കാറ്റിൽപറത്തിക്കൊണ്ടായിരുന്നു ചാണ്ടി ഉമ്മൻ ലീഡ് പിടിച്ചത്.
പിന്നാലെ അകലകുന്നം, കൂരോപ്പടം, മണർക്കാട്, പാമ്പാടി, പുതുപ്പള്ളി, മീനടം, വാകത്താനം തുടങ്ങിയ പഞ്ചായത്തുകളിലെല്ലാം ചാണ്ടി ഉമ്മന് മികച്ച ലീഡ് നേടാൻ കഴിഞ്ഞു. ജെയ്ക്ക് സി തോമസിന് കഴിഞ്ഞ തവണ ലീഡ് ലഭിച്ച മണർക്കാട് പോലും ഇത്തവണ എല്‍ഡിഎഫിന് മുന്നേറാൻ സാധിച്ചില്ല.
