കോട്ടയം: ഈരാറ്റുപേട്ട പൊലീസ് സ്റ്റേഷനിലെ സിവില്‍ പൊലീസ് ഉദ്യോഗസ്ഥനെ തൂങ്ങി മരിച്ച നിലയില്‍ കണ്ടെത്തി. വൈക്കം കുടവെച്ചൂര്‍ അയ്യനാട്ടു കോളനിയില്‍ താമസക്കാരനായ ബിനിലിനെയാണ് കോട്ടയം കലക്ട്രേറ്റിന് സമീപമുള്ള ലോഡ്ജ് മുറിയില്‍ മരിച്ച നിലയില്‍ കണ്ടെത്തിയത്. ഇക്കഴിഞ്ഞ ആറാം തിയതി ജോലിക്കാണെന്നു പറഞ്ഞ് വീട്ടില്‍ നിന്നും ഇറങ്ങിയ ബിനിലിനെ പിന്നീട് കാണാതാകുകയായിരുന്നു. സ്റ്റേഷനില്‍ ഡ്യൂട്ടിക്കെത്തിയിട്ടില്ലെന്ന വിവരം ലഭിച്ചതോടെ ബന്ധുക്കള്‍ വൈക്കം പൊലീസ് സ്റ്റേഷനില്‍ പരാതിപ്പെട്ടു.പൊലീസ് അന്വേഷണം നടക്കുന്നതിനിടെയാണ് ഇന്നു പുലര്‍ച്ചെ ലോഡ്ജ് മുറിയിലെ ഫാനില്‍ തൂങ്ങി മരിച്ച നിലയില്‍ ഇയാളെ കണ്ടെത്തുന്നത്.
നേരം വൈകിയിട്ടും വാതില്‍ തുറക്കാതെ വന്നതോടെ ലോഡ്ജ് ജീവനക്കാര്‍ പൊലീസില്‍ വിവരമറിയിച്ചു. തുടര്‍ന്ന് കോട്ടയം പൊലീസ് എത്തിയാണ് വാതില്‍ തുറന്നത്.ആത്മഹത്യയുടെ കാരണം വ്യക്തമായിട്ടില്ല. ഇന്‍ക്വസ്റ്റ് നടപടികള്‍ പൂര്‍ത്തിയാക്കിയ മൃതദേഹം പോസ്റ്റുമോര്‍ട്ടത്തിനായി കോട്ടയം മെഡിക്കല്‍ കോളേജിലേക്ക് മാറ്റി. കോട്ടയം ഈസ്റ്റ് പൊലീസ് അന്വേഷണം ആരംഭിച്ചു.
