കോട്ടയം: കേരളത്തെ പിടിച്ചുലച്ച മഹാപ്രളയത്തിന്റെ ഓർമ്മകളിലേക്ക് മലയാളികൾ തിരിഞ്ഞുനോട്ടം നടത്തുമ്പോൾ പ്രളയത്തിന്റെ ദയനീയതകൾ ക്യാമറ കണ്ണുകളിലൂടെ പകർത്തി, യുവതലമുറക്ക് വീണ്ടും ഒരു ഓർമ്മപ്പെടുത്തൽ നൽകുകയാണ് ആലപ്പുഴ സ്വദേശിനിയായ കാജൽ ദത്ത് എന്ന യുവഫോട്ടോഗ്രാഫര്‍. പ്രളയകാലത്ത് പകര്‍ത്തിയ 25 ഓളം ചിത്രങ്ങൾ കോര്‍ത്തിണങ്ങി കേരളത്തിലെ കോളജുകളിലും ആര്‍ട്ട് ഗാലറികളിലും ഫോട്ടോ പ്രദർശനങ്ങള്‍ സംഘടിപ്പിക്കുന്ന തിരക്കിലാണ് ചിത്രകാരി കൂടിയായ കാജല്‍. മാന്നാനം കെ ഇ കോളജിലെ നടക്കുന്ന കാജലിന്‍റെ ഫോട്ടോ പ്രദർശനം കാണാന്‍ നിരവധി പേരാണ് എത്തുന്നത്.
പ്രളയത്തിന്റെ ഭീകരമുഖം ആദ്യം കണ്ടറിഞ്ഞ കുട്ടനാട്ടുകാരുടെ നിസ്സഹായമുഖങ്ങളും സാഹചര്യങ്ങളുമാണ് ചിത്രകാരി കൂടിയായ കാജൽ ദത്തിന്റെ ചിത്രങ്ങളിൽ നിറയുന്നത്. പ്രകൃതിസംരക്ഷണത്തിന്റെ ആവശ്യകതകൾ യുവതലമുറയിലേക്ക് പകർന്നു നൽകുന്നതോടൊപ്പം ഇത്തരത്തിൽ പ്രളയങ്ങൾ ഉണ്ടാക്കുന്നതിനുള്ള കാരണങ്ങൾ എന്താണെന്ന് അവരെ ബോധ്യപ്പെടുത്തുക കൂടി പ്രദർശനത്തിന്‍റെ ലക്ഷ്യമാണെന്ന് കാജൽദത്ത് പറയുന്നു.
അവിചാരിതമായാണ് ഫോട്ടോഗ്രഫിയിലെക്കെത്തിയതെങ്കിലും ചിത്രരചനയോടൊപ്പം ഫോട്ടോഗ്രഫി കൂടി മുന്നോട്ടുകൊണ്ടുപോകണമെന്നാണ് കാജൽ ദത്തിന്റെ ആഗ്രഹം.
