കോട്ടയം: വൈക്കത്ത് പൊലീസുകാരന്റെ ഭാര്യയും കുഞ്ഞും മരിച്ച സംഭവത്തില്‍ ദുരൂഹതയുണ്ടെന്ന ആരോപണവുമായി ബന്ധുക്കള്‍ രംഗത്ത്. പൊലീസ് ഉദ്യോഗസ്ഥന്‍ അഭിജിത്തിന്റെ ഭാര്യ ദീപയും രണ്ട് വയസുകാരി മകൾ ദക്ഷയും മരിച്ചതില്‍ ദുരൂഹതയുണ്ടെന്ന് ആരോപിച്ചാണ് ബന്ധുക്കൾ രംഗത്തെത്തിയിരിക്കുന്നത്. ജൂണ്‍ 28 ന് ഭര്‍ത്താവുമായി വഴക്കിട്ട് വീട് വിട്ടിറങ്ങിയ ദീപയുടെയും മകളുടെയും മൃതദേഹങ്ങൾ പിറ്റേന്ന് മൂവാറ്റുപുഴയാറ്റില്‍ കണ്ടെത്തുകയായിരുന്നു.
വിദേശത്ത് നഴ്‌സായി ജോലി ചെയ്യുകയായിരുന്നു ദീപ. പിന്നീട് നാട്ടില്‍ തിരിച്ചെത്തിയെങ്കിലും ഭര്‍ത്താവിന് പൊലീസില്‍ ജോലി ലഭിച്ചതിന് ശേഷം ഇരുവരും തമ്മില്‍ തര്‍ക്കം പതിവായിരുന്നുവെന്നും മദ്യപിച്ചെത്തി ദീപയെ മര്‍ദിക്കാറുണ്ടായിരുന്നെന്നും സഹോദരി ദീപ്തി പറഞ്ഞു. അഭിജിത്തിന്റെ വീട്ടുകാരും മോശമായി പെരുമാറിയിരുന്നതായി ദീപ പറഞ്ഞതായും ബന്ധുക്കൾ ആരോപിച്ചു. സംഭവത്തിലെ ദുരൂഹതയില്‍ അന്വേഷണം ആവശ്യപ്പെട്ട് പൊലീസിനെ സമീപിക്കാനൊരുങ്ങുകയാണ് വീട്ടുകാര്‍.
