കോട്ടയം : കിടങ്ങൂരിലും പരിസര പ്രദേശങ്ങളിലും കഞ്ചാവ് വിൽപന നടത്തിയിരുന്ന യുവാവിനെ പൊലീസ് പിടികൂടി. കിടങ്ങൂർ മംഗളാരം മേലേത്തരപ്പേൽ ഹൗസിൽ റൊണാൾഡോ റോയി(20) ആണ് അറസ്റ്റിലായത്. കിടങ്ങൂർ സ്‌റ്റേഷൻ ഹൗസ് ഓഫിസർ ഇൻസ്‌പെക്ടർ കെ.ആർ ബിജുവിന്‍റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.
ഫെബ്രുവരി എട്ട് തിങ്കളാഴ്ച രാവിലെ ഏഴരയോടെയായിരുന്നു കേസിനാസ്‌പദമായ സംഭവം. കിടങ്ങൂരിലും പരിസരത്തും ബൈക്കിൽ കറങ്ങി നടന്ന് കഞ്ചാവ് വിൽപന നടത്തുന്ന സംഘത്തെക്കുറിച്ച് പൊലീസിന് വിവരം ലഭിച്ചിരുന്നു. ഇതേതുടർന്ന് പൊലീസ് സംഘം പരിശോധന നടത്തുന്നതിനിടെയാണ് കിടങ്ങൂർ മംഗളാരം ഭാഗത്തുവച്ച് റൊണാൾഡോ പിടിയിലാകുന്നത്. ഇയാളെ ചോദ്യം ചെയ്യുകയും ദേഹപരിശോധന നടത്തുകയും ചെയ്തതോടെ കഞ്ചാവ് കണ്ടെത്തി.
ALSO READ: 16 കാരിയെ ലൈംഗികമായി പീഡിപ്പിച്ചു, വീഡിയോ സോഷ്യല്‍ മീഡിയയില്‍ പങ്കുവച്ചു ; കടയുടമ പിടിയില്‍
കിടങ്ങൂർ ഭാഗത്ത് കഞ്ചാവ് വിൽപന നടത്തുന്ന സംഘത്തിലെ പ്രധാന കണ്ണിയാണ് പിടിയിലായ റൊണാൾഡോ. സംഘാംഗളെ കുറിച്ച് കൂടുതൽ അന്വേഷണം നടത്തി വരുന്നതായും പ്രദേശത്ത് നടത്തിയ നിരീക്ഷണം വരും ദിവസങ്ങളിലും തുടരുമെന്നും പൊലീസ് അറിയിച്ചു.
എസ്.എച്ച്.ഒയ്ക്കു ലഭിച്ച രഹസ്യ വിവരത്തിന്‍റെ അടിസ്ഥാനത്തിൽ എസ്.ഐ കുര്യൻ മാത്യു, എ.എസ്.ഐ മഹേഷ് കൃഷ്ണൻ, സിവിൽ പൊലീസ് ഓഫിസർ ജിതീഷ്, ഗ്രിഗോറിയോസ് ജോസഫ് എന്നിവർ ചേർന്നാണ് പ്രതിയെ പിടികൂടിയത്. പ്രതിയെ ഏറ്റുമാനൂർ കോടതിയിൽ ഹാജരാക്കി.
