കോട്ടയം: ജില്ല പഞ്ചായത്ത് പ്രസിഡന്‍റായി കെ വി ബിന്ദു തെരഞ്ഞെടുക്കപ്പെട്ടു. എൽഡിഎഫ് ധാരണ പ്രകാരം കേരള കോൺഗ്രസ് (എം) പ്രതിനിധി നിർമ്മല ജിമ്മി രാജി വച്ചതിനെ തുടർന്നാണ് പ്രസിഡന്‍റ് തെരഞ്ഞെടുപ്പ് നടന്നത്. സിപിഎം കുമരകം ഡിവിഷൻ അംഗമാണ് കെ വി ബിന്ദു.
തെരഞ്ഞെടുപ്പിൽ ജില്ല കലക്‌ടർ ഡോ. പി കെ ജയശ്രീ വരണാധികാരി ആയിരുന്നു. 22 അംഗ ഭരണ സമിതിയിൽ എൽഡിഎഫിന് 14 വോട്ടും യുഡിഎഫിന് ഏഴ് വോട്ടും ലഭിച്ചു. കേരള ജനപക്ഷം സെക്യുലർ അംഗം അഡ്വ. ഷോൺ ജോർജ് തെരഞ്ഞെടുപ്പിൽ നിന്ന് വിട്ടുനിന്നു.
കോൺഗ്രസിലെ രാധാ വി നായരായിരുന്നു യുഡിഎഫ് സ്ഥാനാർഥി. ഇന്ന് ഉച്ചയ്ക്ക് ശേഷം വൈസ് പ്രസിഡന്‍റ് സ്ഥാനത്തേയ്ക്കുള്ള തെരഞ്ഞെടുപ്പ് നടക്കും. സിപിഐയിലെ ശുഭേഷ് സുധാകരനാണ് ഇടതു സ്ഥാനാർഥി. എരുമേലി ഡിവിഷൻ പ്രതിനിധിയാണ് ശുഭേഷ്.
ഇടതുമുന്നണി ധാരണ പ്രകാരം അടുത്ത രണ്ടു വർഷത്തേക്കാണ് സിപിഎമ്മിന് പ്രസിഡന്‍റ് സ്ഥാനവും സിപിഐക്ക്‌ വൈസ് പ്രസിഡന്‍റ് സ്ഥാനവും ലഭിക്കുക. അവസാന ഒരുവർഷം സിപിഐക്ക്‌ ആണ് പ്രസിഡന്‍റ് സ്ഥാനം.
