കോട്ടയം: അതിവേഗ റെയില്‍ പദ്ധതിയായ സില്‍വര്‍ ലൈനിന്‍റെ സാമൂഹിക ആഘാത പഠനത്തിനായി കല്ലിടുന്നതിനെതിരെ സമരം നടത്തിയ നട്ടാശേരി കുടിയാലിപ്പടിയിലെ 100 പേര്‍ക്കെതിരെ പൊലീസ് കേസെടുത്തു. സർവേകുറ്റി പിഴുതതിനാണ് കേസ്. കോട്ടയം കലക്ട്രേറ്റ് വളപ്പില്‍ അതിക്രമിച്ച് കയറി പ്രതീകാത്മക സര്‍വേകുറ്റി സ്ഥാപിച്ച 75 യൂത്ത് കോണ്‍ഗ്രസ് പ്രവര്‍ത്തകര്‍ക്കെതിരെയും കേസെടുത്തിട്ടുണ്ട്.
തുടര്‍ച്ചയായ മൂന്നാം ദിവസവും നട്ടാശേരിയില്‍ കല്ലിടാന്‍ വന്ന കെ റെയില്‍ ഉദ്യോഗസ്ഥരെ നാട്ടുകാര്‍ തടയുന്നത്. വൻ പൊലീസ് സന്നാഹത്തോടെയാണ് കെ റെയില്‍ ഉദ്യോഗസ്ഥര്‍ എത്തിയത്. ഡിവൈഎസ്‌പി റാങ്കിലുള്ള ഉദ്യോഗസ്ഥന്‍റെ നേതൃത്വത്തില്‍ നട്ടാശേരിയില്‍ പൊലീസ് ക്യാമ്പ് ചെയ്യുകയാണ്.
