ആലപ്പി രംഗനാഥ് അന്തരിച്ചു

കൊവിഡ് ബാധിച്ച് കോട്ടയം മെഡിക്കൽ കോളജിൽ ചികിത്സയിലിരിക്കവേയാണ് അന്ത്യം. ഈ വർഷത്തെ ഹരിവരാസനം പുരസ്‌കാര ജേതാവാണ്.

കോട്ടയം: സംഗീത സംവിധായകനും ഗാനരചയിതാവുമായ ആലപ്പി രംഗനാഥ് അന്തരിച്ചു. 70 വയസായിരുന്നു. കൊവിഡ് ബാധിച്ച് കോട്ടയം മെഡിക്കൽ കോളജിൽ ചികിത്സയിലിരിക്കവേയാണ് അന്ത്യം.

1973ൽ പുറത്തിറങ്ങിയ ജീസസ് എന്ന ചിത്രത്തിലൂടെയാണ് ചലച്ചിത്ര രംഗത്തെത്തിയത്. നിരവധി അയ്യപ്പഭക്തി ഗാനങ്ങളിലൂടെ ശ്രോതാക്കൾക്ക് സുപരിചതനായിരുന്നു അദ്ദേഹം. ഈ വർഷത്തെ ഹരിവരാസനം പുരസ്‌കാര ജേതാവാണ്. സിനിമയിലും നാടകത്തിലും ലളിതഗാന ശാഖയിലുമായി 2000ത്തിലേറെ ഗാനങ്ങൾ ചിട്ടപ്പെടുത്തിയിട്ടുണ്ട്.

പപ്പൻ പ്രിയപ്പെട്ട പപ്പൻ, ആരാന്‍റെ മുല്ല കൊച്ചുമുല്ല, മാമലകൾക്കപ്പുറത്ത്, മടക്കയാത്ര, ക്യാപ്റ്റൻ, ഗുരുദേവൻ തുടങ്ങിയവയാണ് പ്രധാന സിനിമകൾ. പൂച്ചയ്ക്കൊരു മൂക്കുത്തി, വിസ, എനിക്കു മരണമില്ല തുടങ്ങിയ സിനിമകൾക്ക് പശ്ചാത്തലസംഗീതം ഒരുക്കി.