കൊല്ലം: ഇരവിപുരത്ത് മത്സ്യബന്ധന ബോട്ട് അപകടത്തിൽപ്പെട്ടു. കടലിൽ കനത്ത മൂടൽ മഞ്ഞ് അനുഭവപ്പെട്ടതിനെ തുടർന്നാണ് അപകടം. മൂടൽമഞ്ഞിൽ അകപ്പെട്ട് ബോട്ട് തീരത്തേക്ക് ഇടിച്ചുകയറുകയായിരുന്നു.
ഒൻപത് മത്സ്യത്തൊഴിലാളികളാണ് ബോട്ടിൽ ഉണ്ടായിരുന്നത്. ഇവർ പരിക്കുകളില്ലാതെ രക്ഷപ്പെട്ടു. ശക്തികുളങ്ങര അരവിള സ്വദേശി പ്രകാശിന്‍റെ ഉടമസ്ഥതയിലുള്ള വേളാങ്കണ്ണി മാതാവ് എന്ന ബോട്ടാണ് അപകടത്തിൽപ്പെട്ടത്. പുലർച്ചെ മുതൽ തന്നെ കൊല്ലത്തെ തീരമേഖലയിൽ കനത്ത മൂടൽ മഞ്ഞ് അനുഭവപ്പെട്ടിരുന്നു.
നീണ്ടകര, ഇരവിപുരം കൊല്ലം ബീച്ച് പരവൂർ എന്നീ തീരമേഖലയിലാണ് കനത്ത മൂടൽമഞ്ഞ് അനുഭവപ്പെട്ടത്. പ്രദേശത്താകെ രാവിലെ 8 മണി വരെ കനത്ത മൂടൽമഞ്ഞായിരുന്നു. സാധാരണ ഡിസംബർ, ജനുവരി മാസങ്ങളിലാണ് ഇത്തരത്തിൽ മൂടൽമഞ്ഞ് അനുഭവപ്പെട്ടിരുന്നത്. എന്നാൽ ഓഗസ്റ്റ് മാസത്തില്‍ ഇത്രയും ശക്തമായ മൂടൽമഞ്ഞ് കാണപ്പെടുന്നത് ആദ്യമായിട്ടാണെന്ന് മത്സ്യത്തൊഴിലാളികൾ പറഞ്ഞു.
