കൊല്ലം: കേരളത്തിന്‍റെ അക്ഷര മുത്തശ്ശി ഭാഗീരഥിയമ്മ (107) അന്തരിച്ചു. 106ാം വയസിൽ നാലാം ക്ലാസ് തുല്യതാ പരീക്ഷ പാസായ പ്രാക്കുളം സ്വദേശിനി ഭാഗീരഥിയമ്മ വ്യാഴാഴ്‌ച അര്‍ധരാത്രിയോടെയാണ് മരിച്ചത്. വാര്‍ധക്യ സഹജമായ രോഗങ്ങളെ തുടര്‍ന്നായിരുന്നു മരണം. നാളുകളായി ചികിത്സയിലായിരുന്നു. ഉച്ചയ്ക്ക് രണ്ട് മണിക്ക് വീട്ടുവളപ്പില്‍ സംസ്‌കാരം നടക്കും.
'പ്രായം വെറും സംഖ്യ മാത്രം'
പ്രായത്തെ വെറും സംഖ്യ മാത്രമാക്കിയുള്ള ഭാഗീരഥിയമ്മയുടെ നേട്ടത്തെ പ്രധാനമന്ത്രി നരേന്ദ്ര മോദി റേഡിയോ പരിപാടിയായ മൻ കി ബാത്തിലെ 62-ാമത്തെ എപ്പിസോഡിൽ അഭിനന്ദിച്ചിരുന്നു. കേന്ദ്ര സര്‍ക്കാരിന്‍റെ നാരീശക്തി പുരസ്‌കാര ജേതാവ് കൂടിയാണ് ഭാഗീരഥിയമ്മ. പരീക്ഷയിലെ വിജയശതമാനവും മോദി എടുത്തുപറഞ്ഞു. ഭാഗീരഥിയമ്മ രാജ്യത്തിന് പ്രചോദനമാണെന്നും പ്രത്യേക സല്യൂട്ടെന്നും പ്രധാനമന്ത്രി പരിപാടിയിൽ പറഞ്ഞിരുന്നു. 275ല്‍ 205 മാര്‍ക്കോടെയായിരുന്നു അക്ഷര മുത്തശ്ശി തുല്യത പരീക്ഷ പാസായത്. കണക്ക് പരീക്ഷയിൽ മുഴുവൻ മാർക്കും മുത്തശ്ശി നേടിയിരുന്നു.
ഏവര്‍ക്കും പ്രചോദനം
2019ല്‍ സംസ്ഥാന സാക്ഷരതാ മിഷന്‍ നടത്തിയ പരീക്ഷയിലാണ് ഭാഗീരഥിയമ്മ നാലാം ക്ലാസ് പാസായത്. ശേഷം നിരവധി പുരസ്‌കാരങ്ങള്‍ മുത്തശ്ശിയെ തേടിയെത്തി. പഠിക്കാനും അറിവ് നേടാനും വളരെയധികം താത്പര്യമുണ്ടായിരുന്നു ഈ അമ്മക്ക് ചെറുപ്പ കാലത്തെ ബുദ്ധിമുട്ടുകള്‍ കാരണം പഠനം തുടരാനായില്ല. ചെറുപ്പത്തിലേ അമ്മ മരിച്ച ശേഷം ഇളയ കുട്ടികളെ പരിപാലിച്ചത് ഭാഗീരഥിയമ്മയായിരുന്നു. ഒമ്പതാം വയസിൽ മൂന്നാം ക്ലാസില്‍ വച്ചാണ് ഭാഗീരഥിയമ്മ ഔപചാരിക വിദ്യാഭ്യാസം ഉപേക്ഷിച്ചത്. ഭാഗീരഥിയമ്മയുടെ വിജയം പ്രായഭേദമന്യേ എല്ലാവര്‍ക്കും പ്രചോദനമാണ്.
READ MORE: കൊവിഡിനെ കുറിച്ച് അറിഞ്ഞു; അക്ഷരങ്ങളില്‍ ആശ്വാസം നിറച്ച് അക്ഷര മുത്തശി
