കൊല്ലം: മൺമറഞ്ഞ നാട്ടറിവുകൾ തിരിച്ചുപിടിക്കണം. പ്രകൃതിയേയും മണ്ണിനേയും പുതുതലമുറയ്ക്ക് തിരിച്ചു നല്‍കണം. ഒരു ജനതയുടെ കാർഷിക സംസ്കാരം കുട്ടികൾക്കിടയിൽ പ്രചരിപ്പിക്കുന്നതിന്റെ ഭാഗമായാണ് സംസ്ഥാന വിദ്യാഭ്യാസ, കൃഷി വകുപ്പുകളുടേയും സേഫ് കൊല്ലം പദ്ധതിയുടെയും സംയുക്ത ആഭിമുഖ്യത്തിൽ വെളിയം കുടവട്ടൂർ ഏലായിൽ മരമടി മഹോത്സവവും ഞാറു നടീൽ പ്രവർത്തനങ്ങളും സംഘടിപ്പിച്ചത്.
മണ്ണും മനസും പ്രകൃതിയില്‍ സമർപ്പിച്ച് കാളക്കൂട്ടങ്ങളുടെ വേഗപ്പോര് ഉഴുതുമറിച്ച പാടത്ത് ഞാറ്റുപാട്ടുകൾ ഏറ്റുപാടി വിദ്യാർഥികൾ ഞാറു നട്ടു. പിന്നാലെ ആയിരത്തോളം കാണികളെ ആവേശഭരിതരാക്കി കാളക്കൂട്ടങ്ങളുടെ വേഗപ്പാച്ചിൽ. ഓടി മാറിയും ആർപ്പുവിളിച്ചും വിദ്യാർഥികളും നാട്ടുകാരും ഒപ്പം ചേര്‍ന്നു. സീനിയർ, ജൂനിയർ, സബ് ജൂനിയർ ഇനങ്ങളിൽ ആണ് കാളക്കൂട്ടങ്ങൾ മാറ്റുരച്ചത്. ഇരുവശങ്ങളിൽ നാട്ടിയ കൊടികൾക്ക് ഇടയിലൂടെ കാളകൾ പാഞ്ഞെത്തിയതോടെ കാണികൾ ആവേശഭരിതരായി. ഭയന്ന് പിൻമാറിയവരുമുണ്ട്. കുറഞ്ഞ സമയത്തിനുള്ളിൽ ലക്ഷ്യസ്ഥാനത്ത് എത്തുന്ന കാളകളാണ് വിജയികളാവുക. വിവിധ ജില്ലകളിൽ നിന്നായി 25 ഓളം ജോഡി കാളകൾ മരമടി മത്സരത്തിന് എത്തിയിരുന്നു. കാളക്കൂട്ടങ്ങളുടെ വേഗപ്പോരില്‍ ആവേശം കൊണ്ടവർ മൺമറഞ്ഞു പോയ കൃഷി അറിവുകളും നെല്ലിന്റെ പ്രസക്തിയും മനസിലാക്കിയാണ് മരമടി മത്സരം കണ്ട് മടങ്ങിയത്.
