കൊല്ലം: കൊട്ടാരക്കരയിൽ യുവതിയെ കടന്ന് പിടിച്ച ഡി.വൈ.എഫ്.ഐ നേതാവ് അറസ്‌റ്റില്‍. സിപിഎം കുളക്കട ലോക്കൽ കമ്മിറ്റി അംഗം കൂടിയായ പൂവറ്റൂർ സ്വദേശി രാഹുലിനെയാണ് പൊലീസ് അറസ്‌റ്റ് ചെയ്‌തത്. ഇതേതുടര്‍ന്ന് രാഹുലിനെ സിപിഎമ്മിന്‍റെ പ്രാഥമിക അംഗത്വത്തിൽ നിന്ന് പുറത്താക്കി.
കഴിഞ്ഞ ദിവസം രാത്രിയിൽ ക്ഷേത്രോത്സവം കഴിഞ്ഞ് മടങ്ങുകയായിരുന്ന യുവതിയുടെ പിന്നാലെയെത്തിയ രാഹുൽ അശ്ലീല ചുവയോടെ സംസാരിച്ചു. ശേഷം, ഇയാള്‍ യുവതിയുടെ ശരീരത്ത് കടന്ന് പിടിക്കുകയായിരുന്നുവെന്നാണ് പരാതി. യുവതി ബഹളം വച്ചതോടെ നാട്ടുകാർ ഓടിക്കൂടിയപ്പോള്‍ പ്രതി ബൈക്കിൽ രക്ഷപ്പെടുകയായിരുന്നു.
യുവതി നല്‍കിയ പരാതിയുടെ അടിസ്ഥാനത്തിൽ കേസെടുത്ത കൊട്ടാരക്കര പൊലീസ്, രാഹുലിനെ വീടിന് സമീപത്ത് നിന്ന് പിടികൂടി. സ്‌ത്രീത്വത്തെ അപമാനിച്ചതടക്കമുള്ള വകുപ്പുകൾ ഇയാള്‍ക്കെതിരെ ചുമത്തിയിട്ടുണ്ട്.
ഇത്തരം സാമൂഹിക വിരുദ്ധ പ്രവർത്തനം നടത്തുന്നവരെ സംരക്ഷിക്കില്ലെന്ന് സിപിഎം കൊട്ടാരക്കര ഏരിയ കമ്മിറ്റിക്കുള്ളതെന്ന് നേതൃത്വം വ്യക്തമാക്കി.
