കാസര്‍കോട്: ജില്ലയില്‍ മത്സര രംഗത്തുള്ളവരില്‍ വനിതാ പ്രാതിനിധ്യമായി ഒരാള്‍ മാത്രം. അണ്ണാ ഡെമോക്രാറ്റിക് ഹ്യൂമന്‍ റൈറ്റ്‌സ് പാര്‍ട്ടി ഓഫ് ഇന്ത്യയുടെ സ്ഥാനാര്‍ഥിയായി കരിവേടകം സ്വദേശി ആര്‍.രേഷ്‌മയാണ് കാഞ്ഞങ്ങാട് മണ്ഡലത്തില്‍ നിന്നും ജനവിധി തേടുന്നത്. സംസ്ഥാനത്തെ ഏറ്റവും പ്രായം കുറഞ്ഞ സ്ഥാനാര്‍ഥികളിലൊരാള്‍ കൂടിയാണ് ഇരുപത്തഞ്ചുകാരിയായ രേഷ്‌മ. തെരഞ്ഞെടുപ്പില്‍ മത്സരിക്കാനുള്ള കുറഞ്ഞ പ്രായപരിധിയായ 25 വയസ് തികഞ്ഞതിന് തൊട്ട് പിന്നാലെയാണ് രേഷ്‌മ തെരഞ്ഞെടുപ്പ് ഗോദയിലിറങ്ങിയത്. പോരാട്ടം നിലവിലെ റവന്യൂ വകുപ്പ് മന്ത്രി ഇ. ചന്ദ്രശേഖരനോടും മറ്റു മുന്‍നിര മുന്നണികളോടുമാണ്.
വിദ്യാര്‍ഥിയായിരിക്കുന്ന കാലം മുതല്‍ ദളിത് രാഷ്ട്രീയം ഉയര്‍ത്തിപ്പിടിച്ച പ്രവര്‍ത്തനത്തിലെ കരുത്തുമായി തെരഞ്ഞെടുപ്പില്‍ കന്നിയങ്കം കുറിക്കുമ്പോള്‍ ജില്ലയിലെ 38 സ്ഥാനാര്‍ഥികളില്‍ ഏക വനിതാ സാന്നിധ്യമായും രേഷ്‌മ മാറുന്നു. ജില്ലയിലെ ദളിത് പോരാട്ടങ്ങളിലെ സജീവസാന്നിധ്യമായ രേഷ്‌മയെ പോരാട്ടത്തിലിറക്കിയ എഡിഎച്ച്ആര്‍എമ്മും ലക്ഷ്യമിടുന്നത് സ്ഥാനാര്‍ഥിയുടെ വോട്ടര്‍മാര്‍ക്കിടയിലെ സ്വാധീനം തന്നെയാണ്.
ജില്ലയില്‍ ഏറ്റവും കൂടുതല്‍ ദളിത് ആദിവാസി വിഭാഗങ്ങള്‍ അധിവസിക്കുന്ന കാഞ്ഞങ്ങാട് മണ്ഡലത്തില്‍ ഓരോ കോളനിയും കയറിയിറങ്ങിയാണ് പ്രധാനമായും രേഷ്‌മ വോട്ടഭ്യര്‍ഥിക്കുന്നത്. 2014ലെ ലോക്‌സഭാ തെരഞ്ഞെടുപ്പ് വേളയില്‍ ഡിഎസ്എസ് സ്ഥാനാര്‍ഥിയായിരുന്നു ഗോത്രമൂപ്പന്‍ നെല്ലിക്കാടന്‍ കണ്ണന് വേണ്ടി പ്രചാരണം നയിച്ചത് രേഷ്‌മയായിരുന്നു. ഇത്തരത്തിലുള്ള പ്രവര്‍ത്തനങ്ങള്‍ ഇപ്പോഴത്തെ തെരഞ്ഞെടുപ്പ് പ്രചാരണങ്ങളില്‍ കരുത്താണെന്ന് സ്ഥാനാര്‍ഥി പറയുന്നു.
ദളിത് സര്‍വ്വീസ് സൊസൈറ്റിയുടെ രാഷ്ട്രീയ രൂപമായ അണ്ണാ ഡമോക്രാറ്റിക്ക് ഹ്യൂമന്‍ റൈറ്റ്‌സ് പാര്‍ട്ടി ജില്ലയിലെ മുഴുവന്‍ മണ്ഡലങ്ങളിലും മത്സരിക്കുന്നുണ്ട്. ജില്ലയില്‍ മുഖ്യധാരാ രാഷ്ട്രീയ പാര്‍ട്ടികളൊന്നും സ്ത്രീകളെ പരിഗണിക്കാത്ത ഘട്ടത്തിലാണ് കാഞ്ഞങ്ങാട്ടെ രേഷ്‌മയുടെ സ്ഥാനാര്‍ഥിത്വം ശ്രദ്ധേയമാകുന്നത്. മന്ത്രി ഇ.ചന്ദ്രശേഖരന്‍ മത്സരിക്കുന്ന മണ്ഡലത്തില്‍ രേഷ്‌മയടക്കം പതിനൊന്ന് സ്ഥാനാര്‍ഥികള്‍ ജനവിധി തേടുന്നുണ്ട്.
