കാസർകോട് : കുമ്പളയിൽ കാർ അപകടത്തിൽപ്പെട്ട് (Kasaragod Car Accident) വിദ്യാർഥി മരിച്ച സംഭവത്തിൽ വീഴ്ചയുണ്ടെന്ന് കണ്ടെത്തിയാൽ പൊലീസുകാർക്കെതിരെ നടപടിയുണ്ടാകുമെന്ന് ജില്ല പൊലീസ് മേധാവി വൈഭവ് സക്സേന (Kumbla Student Death). വിഷയത്തില്‍ ക്രൈംബ്രാഞ്ച് അന്വേഷണം പുരോഗമിക്കുകയാണെന്നും അദ്ദേഹം പറഞ്ഞു. കാസര്‍കോട് മാധ്യമങ്ങളോട് പ്രതികരിക്കുകയായിരുന്നു വൈഭവ് സക്സേന (Kasaragod SP on Farhas death). അന്വേഷണം പൂർത്തിയാക്കി ഉടൻ റിപ്പോർട്ട് നൽകുമെന്നും ശേഷം തുടര്‍ നടപടികള്‍ സ്വീകരിക്കുമെന്നും ജില്ല പൊലീസ് മേധാവി വ്യക്തമാക്കി. ഇന്നലെ (ഓഗസ്റ്റ് 29) രാവിലെയാണ്, കുമ്പളയില്‍ കാര്‍ അപകടത്തില്‍പ്പെട്ട് ചികിത്സയിലായിരുന്ന വിദ്യാര്‍ഥി ഫര്‍ഹാസ് മരിച്ചത്. വെള്ളിയാഴ്‌ചയുണ്ടായ (ഓഗസ്റ്റ് 25) അപകടത്തെ തുടര്‍ന്ന് മംഗളൂരുവിലെ സ്വകാര്യ ആശുപത്രിയില്‍ ചികിത്സയില്‍ കഴിയവേയാണ് മരണം.
ആരോപണവുമായി കുടുംബം : സംഭവത്തിന് പിന്നാലെ പൊലീസുകാര്‍ക്കെതിരെ ആരോപണവുമായി കുടുംബം രംഗത്തെത്തിയിരുന്നു. പൊലീസുകാര്‍ പിന്തുടര്‍ന്നതിനെ തുടര്‍ന്നാണ് കാര്‍ അപകടത്തില്‍പ്പെട്ടതെന്നും അതുകൊണ്ട് അവര്‍ക്കെതിരെ കൊലക്കുറ്റത്തിന് കേസെടുക്കണമെന്നുമാണ് കുടുംബത്തിന്‍റെ ആരോപണം. ഫര്‍ഹാസിന്‍റെ മരണത്തിന് പിന്നാലെ പൊലീസുകാരെ സ്ഥലം മാറ്റുക മാത്രം ചെയ്‌തതില്‍ തൃപ്‌തരല്ലെന്നും കുടുംബം പറഞ്ഞു. ഇനി ആർക്കും ഇങ്ങനെയൊരു അവസ്ഥയുണ്ടാകരുത്. കുറ്റാരോപിതരായവരെ പൊലീസ് സംരക്ഷിക്കുന്ന നടപടിയാണുണ്ടായത്. സംഭവത്തില്‍ ജുഡീഷ്യൽ അന്വേഷണം വേണം. ഏതറ്റം വരെയും നിയമ നടപടികളുമായി മുന്നോട്ടുപോകുമെന്നും ഫർഹാസിന്‍റെ കുടുംബം അറിയിച്ചു.
പ്രതിഷേധവുമായി യൂത്ത് ലീഗ് : പൊലീസ് പിന്തുടര്‍ന്നതിനെ തുടര്‍ന്ന് കാര്‍ അപകടത്തില്‍പ്പെട്ട് വിദ്യാര്‍ഥി മരിച്ച സംഭവത്തില്‍ പൊലീസ് ഉദ്യാഗസ്ഥര്‍ക്കെതിരെ നടപടിയെടുക്കണമെന്ന് ആവശ്യപ്പെട്ട് മുസ്‌ലിം ലീഗും (Youth League Protest in Kasaragod Car accident) രംഗത്തെത്തി. കുറ്റാരോപിതരായ ഉദ്യോഗസ്ഥരെ സസ്പെൻഡ് ചെയ്‌ത് നിയമ നടപടിയെടുക്കണമെന്ന് ലീഗ് ആവശ്യപ്പെട്ടു. പൊലീസുകാർക്കെതിരെ നടപടി വേണമെന്നാവശ്യപ്പെട്ട് യൂത്ത് ലീഗ് കുമ്പള പൊലീസ് സ്റ്റേഷൻ ഉപരോധിച്ചിരുന്നു.
'അപകടത്തിലേക്ക് തള്ളിവിട്ട് പൊലീസ്' : ഇക്കഴിഞ്ഞ വെള്ളിയാഴ്‌ചയാണ് (ഓഗസ്റ്റ് 25) അംഗടിമോഗർ ജിഎച്ച്എസ്എസിലെ പ്ലസ്‌ ടു വിദ്യാർഥിയായ ഫർഹാസും സുഹൃത്തുക്കളും സഞ്ചരിച്ച കാർ അപകടത്തില്‍പ്പെട്ടത്. സംഭവത്തിന് പിന്നാലെ അപകടത്തിന്‍റെ സിസിടിവി ദൃശ്യങ്ങള്‍ പുറത്തുവന്നതോടെയാണ് പൊലീസ് ഉദ്യോഗസ്ഥര്‍ക്കെതിരെ പ്രതിഷേധം ഉയര്‍ന്നത്. അഞ്ചുകിലോമീറ്റര്‍ ദൂരം പൊലീസ് കാര്‍ പിന്തുടരുന്നത് സിസിടിവി ദൃശ്യങ്ങളിലുണ്ട്. ഓണാഘോഷ പരിപാടികള്‍ കഴിഞ്ഞ് സ്‌കൂളില്‍ നിന്നും മടങ്ങുമ്പോഴായിരുന്നു അപകടം. കുമ്പളയില്‍ പൊലീസിന്‍റെ വാഹന പരിശോധനയ്ക്കി‌ടെ കാര്‍ നിര്‍ത്താതെ പോയതോടെ പൊലീസ് പിന്തുടരുകയായിരുന്നു. ഇത് മനസിലാക്കിയ വിദ്യാര്‍ഥികള്‍ അമിത വേഗത്തില്‍ കാറോടിച്ച് പോവുകയും റോഡരികിലെ മതിലില്‍ ഇടിച്ച് കാര്‍ തലകീഴായി മറിയുകയുമായിരുന്നു.
