കാസർകോട്‌: വിവിധയിനം നെല്‍വിത്തുകളുടെ ശേഖരം കൊണ്ട്‌ സമ്പന്നനാണ്‌ കാസർകോട്ടെ നെട്ടണിഗെയിലെ സത്യനാരായണ. ജപ്പാൻ വയലറ്റും ഫിലിപ്പിൻസ് മനിലയും മൈസൂർ രാജാക്കൻമാർ ഉപയോഗിച്ചിരുന്ന രാജമുടിയും
അസം ബ്ലാക്കും ഉൾപ്പെടെ വിദേശത്തേയും സ്വദേശത്തെയുമടക്കം 650ഓളം നെൽ വിത്തുകളാണ്‌ കർഷകനായ സത്യനാരായണയുടെ കൈവശമുള്ളത്‌. 450 ഇനം വിത്തുകൾ സത്യ നാരായണയുടെ കൃത്രിമ പാടത്ത് കൊയ്യാൻ പാകമായിരിക്കുന്നു.
വിളവെടുപ്പിനൊരുങ്ങി അപൂർവ്വയിനങ്ങള്‍
അപൂർവയിനങ്ങളടക്കം 200 നെൽവിത്തുകൾ രണ്ടാം വിളക്കായി ഒരുങ്ങി നില്പുണ്ട്. അർബുദത്തെ പ്രതിരോധിക്കുന്നതും പ്രമേഹത്തെ നിയന്ത്രിക്കുന്നതുമായ ഔഷധ നെല്ലുകളുമുണ്ട്‌ കൂട്ടത്തില്‍. കേരളത്തിൽ തന്നെ അപൂർവ്വമായ ഒരു വിത്തിൽ തന്നെ ഇരട്ട അരി കിട്ടുന്ന ജുഗൽ നെൽ വിത്തുകളും ഈ കർഷകന്‍റെ കയ്യിൽ ഭദ്രമായുണ്ട്.
ALSO READ : ആലുവയില്‍ കെ.എസ്.യു - എസ്.എഫ്.ഐ സംഘർഷം; നിരവധി പേർക്ക് പരിക്ക്
റബ്ബർ കർഷകനായ സത്യനാരായണന് രണ്ടിനം വിത്തുകളുമായി 12 വർഷം മുമ്പാണ് നെല്ലിനോട് പ്രണയം തോന്നിയത്. പിന്നീട് അപൂർവ്വയിനം വിത്തുകൾ കണ്ടെത്താനുള്ള അന്വേഷണമായി. കർണാടകയിലും വയനാടും കുട്ടനാടും പട്ടമ്പിയും ഉൾപ്പെടെയുള്ള സ്ഥലങ്ങളിൽ നിന്നും വിത്തുകൾ ശേഖരിച്ചു. രാജസ്ഥാനിലും മറ്റു സംസ്ഥാനങ്ങളിലും വിത്തുകൾക്ക് വേണ്ടി പോയിട്ടുണ്ടെന്നും സത്യ നാരായണ പറയുന്നു.
വീടിന്‌ സമീപത്തെ ചെറിയ പാടത്തും ബാക്കിയുള്ള സ്ഥലത്ത് ടാർപായയിൽ വെള്ളം കെട്ടി നിർത്തിയുമാണ് നെൽകൃഷി. ഗ്രോ ബാഗുകളിലാണ്‌ ആദ്യം വിത്തിടുന്നത്. അത്‌ പിന്നീട് പാടത്തേക്ക് മാറ്റും.
മികച്ച വിളവും അതിജീവന ശേഷിയും
ഉപ്പുവെള്ളത്തിലും നശിച്ചു പോകാതെ മികച്ച വിളവ് തരുന്ന കഗ്ഗയും ദിവസങ്ങളോളം വെള്ളത്തിൽ മുങ്ങി നിന്നാലും ചീയാത്ത ഏടികൂണിയും വരണ്ട മണ്ണിലും പൊൻകതിർ വിളയുന്ന വെള്ളത്തോവനും ഔഷധമൂല്യമുള്ള പത്തിനം വിത്തുകളും പ്രസവശേഷം സ്ത്രീകൾ കഞ്ഞിവച്ചു കുടിച്ചിരുന്ന അന്തേ മൊഹരിയും ഇരുമ്പു സത്ത് ധാരാളമുള്ള കരിഗ ജവലയും ആന്ധ്രാ ബസുമതിയും മണിപ്പൂര ഭട്ടയും അടക്കം വ്യത്യസ്‌ത നിറങ്ങളിലുള്ള നെല്ലുകളും ഇദ്ദേഹത്തിന്‍റെ കൊച്ചുപാടത്ത് വിളഞ്ഞു നില്പുണ്ട്. അപൂർവ വിത്തുകളുടെ സംരക്ഷകൻ ആയതോടെ കർണാടകത്തിലേയും കേരളത്തിലെയും കാർഷിക വിദ്യാർഥികളും ഗവേഷകരും ഇദ്ദേഹത്തിന്‍റെ വിത്ത് ലാബിലെ സന്ദർശകാരായി മാറി. വിത്ത് പ്രേമം അറിഞ്ഞ്‌ നിരവധി സുഹൃത്തുക്കളും ഇദ്ദേഹത്തിന് വിത്തുകൾ കൈമാറുന്നുണ്ട്.
ALSO READ : പെഗാസസ് ഫോണ്‍ചോര്‍ത്തല്‍ അന്വേഷിക്കാൻ പ്രത്യേക സമിതി
ആവശ്യക്കാർക്ക് സൗജന്യമായി വിത്തുകൾ നൽകാനും സത്യ നാരായണ മടിക്കാറില്ല. ഗ്രോ ബാഗ് നെൽകൃഷിയുടെ കാര്യമറിഞ്ഞ്‌ ഡൽഹിയിലെ വിത്തു ബാങ്കിൽ നിന്നും 30 ഇനം വിത്തുകൾ നൽകിയതായും ഇദ്ദേഹം പറയുന്നു .എന്നാൽ വിത്തുകളും കൃഷിയും സംരക്ഷിക്കാൻ ഏറെ ബുദ്ധിമുട്ട് അനുഭവിക്കേണ്ടി വരുന്നുണ്ട് ഈ കർഷകന്.
വിത്തുകൾക്ക് എലികളാണ് വില്ലനെങ്കിൽ കതിരുകൾക്ക് പക്ഷികളാണ് വില്ലന്മാർ. റബ്ബർ കർഷകനായ സത്യ നാരായണ റബർ വെട്ടുകഴിഞ്ഞാൽ നെൽപാടത്ത് തന്നെ സജീവമായി ഉണ്ടാകും. മകൻ അഭിനവും ഒപ്പം കൂടും.
ഭാര്യ ജയശ്രീയും മറ്റുമക്കളായ നവ്യശ്രീയും, ഗ്രീഷ്മയും പിന്തുണയുമായി ഒപ്പമുണ്ട്.
