കാസർകോട് : സ്‌കൂൾ അസംബ്ലിയിൽ പ്രധാനാധ്യാപിക ദളിത് വിദ്യാർഥിയുടെ മുടി മുറിച്ച കേസിൽ പൊലീസിനെതിരെ ഗുരുതര ആരോപണവുമായി രക്ഷിതാക്കൾ (Dalit student's hair cut Case). അധ്യാപിക നൽകിയ മുൻകൂർ ജാമ്യാപേക്ഷയിൽ കോടതി വിധി വരും വരെ പൊലീസ് അറസ്റ്റ് വൈകിപ്പിക്കുന്നു എന്നാണ് രക്ഷിതാക്കളുടെ ആരോപണം. ഇതിനിടെ വിദ്യാർഥി മറ്റൊരു സ്‌കൂളിൽ പ്രവേശനം നേടി.
സംഭവത്തിന്‌ ശേഷം കുട്ടി കടുത്ത മാനസിക പ്രയാസത്തിൽ ആയിരുന്നുവെന്ന് രക്ഷിതാക്കൾ പറയുന്നു. പ്രധാനാധ്യാപിക ഒളിവിൽ കഴിയുന്ന സ്ഥലം മനസിലായിട്ടും പൊലീസ് അറസ്റ്റ് ചെയ്യുന്നില്ല എന്നാണ് ഇവരുടെ പരാതി. തങ്ങൾക്ക് വേണ്ടത്ര പരിഗണന ലഭിക്കുന്നില്ലെന്നും കുട്ടിയുടെ പിതാവ് ഇടിവി ഭാരതിനോട് പറഞ്ഞു.
സാമ്പത്തികം ഉള്ളവരുടെ കൂടെയാണ് എല്ലാവരും. തങ്ങളുടെ കൂടെ ആരും ഇല്ലെന്നും ഇവർ പറഞ്ഞു. കോട്ടമല എംജിഎം യുപി സ്‌കൂളിലെ അഞ്ചാം ക്ലാസ് വിദ്യാർഥിക്ക് നേരെ കഴിഞ്ഞ മാസം 19നാണ് അതിക്രമം നടന്നത്. സംഭവം നടന്ന് 20 ദിവസം കഴിഞ്ഞിട്ടും അസംബ്ലിയിൽവച്ച് വിദ്യാർഥിയുടെ മുടി മുറിച്ച പ്രധാനാധ്യാപിക ഷേർളി ജോസഫ് ഒളിവിലാണ്.
കേസിൽ നീതി ലഭിക്കുന്നതുവരെ നിയമ പോരാട്ടം തുടരാനാണ് രക്ഷിതാക്കളുടെ തീരുമാനം. അതേസമയം പ്രാധാനാധ്യാപിക നൽകിയ മുൻകൂർ ജാമ്യാപേക്ഷ കാസർകോട് ജില്ല സെഷൻസ് കോടതി നാളെ പരിഗണിക്കും. സംഭവത്തിൽ വിശദമായ അന്വേഷണം നടത്തി റിപ്പോർട്ട്‌ നൽകാൻ വിദ്യാഭ്യാസ മന്ത്രി വി ശിവൻ കുട്ടി നേരത്തേ നിർദേശം നൽകിയിരുന്നു.
ബാലാവകാശ കമ്മിഷനും സംഭവത്തിൽ സ്വമേധയാ കേസെടുത്തിരുന്നു. രക്ഷിതാവിന്‍റെ പരാതിയിൽ അധ്യാപികക്കെതിരെ ചിറ്റാരിക്കൽ പൊലീസ് ജാമ്യമില്ലാ കുറ്റം ചുമത്തിയാണ് കേസെടുത്തത്. അഞ്ചാം ക്ലാസിൽ പഠിക്കുന്ന ആൺകുട്ടിയുടെ മുടിയാണ് അധ്യാപിക വെട്ടിമാറ്റിയത്. കുട്ടി സ്‌കൂളിൽ വരാതായതോടെ എസ്‌സി പ്രൊമോട്ടർ അന്വേഷിച്ച് വന്നതോടെയാണ് സംഭവം പുറത്തുവന്നത്. ഇതോടെ വ്യാപക പ്രതിഷേധം ഉയരുകയായിരുന്നു.
READ ALSO: ദളിത് വിദ്യാർഥിയുടെ തലമുടി മുറിച്ച സംഭവം, പ്രധാനാധ്യാപിക മുൻകൂർ ജാമ്യാപേക്ഷ നൽകി
സഹപാഠിയോട് സംസാരിച്ചതിന് വിദ്യാർഥിയെ മർദിച്ച് അധ്യാപകൻ : അടുത്തിടെയാണ് കോഴിക്കോട് വിദ്യാർഥിയെ അധ്യാപകൻ ക്രൂരമായി മർദിച്ചതായി പരാതി (student was brutally beaten by the teacher) ഉയർന്നത്. സഹപാഠിയോട് സംസാരിച്ചതിനാണ് വിദ്യാർഥിയെ അധ്യാപകൻ മർദിച്ചതെന്നാണ് ആരോപണം. മലപ്പുറം ഒഴുകൂർ ഹയർ സെക്കന്‍ഡറി സ്‌കൂൾ ഒൻപതാം ക്ലാസ് വിദ്യാർഥിക്കാണ് മർദനമേറ്റത്.
READ MORE: വിദ്യാർഥിയെ അധ്യാപകൻ ക്രൂരമായി മർദിച്ചതായി പരാതി
ഒക്‌ടോബർ 31ന് ഉച്ചയ്‌ക്ക് ശേഷമായിരുന്നു സംഭവം നടന്നത്. സഹപാഠിയായ പെൺകുട്ടിയോട് സംസാരിച്ചതിൻ്റെ ചിത്രം പകർത്തിയ ശേഷമാണ് അധ്യാപകൻ മർദിച്ചത് എന്നാണ് വിദ്യാർഥി പറയുന്നത്. മർദനമേറ്റതിന് പിന്നാലെ വിദ്യാർഥി കൊണ്ടോട്ടി താലൂക്ക് ആശുപത്രിയിൽ ചികിത്സ തേടിയിരുന്നു. കുട്ടിയുടെ മാതാപിതാക്കൾ ചൈൽഡ് ലൈനിൽ പരാതി നൽകിയിട്ടുണ്ട്.
