കണ്ണൂർ: രണ്ട് ചരക്ക് ലോറികൾ കൂട്ടിയിടിച്ചുണ്ടായ അപകടത്തിൽ ഇരു വാഹനത്തിലെയും ഡ്രൈവർമാർക്ക് പരിക്ക്. ദേശിയ പാതയിൽ പാലിശ്ശേരി സിവ്യൂ പാർക്കിന് മുന്നിലാണ് അപകടം നടന്നത്. തകർന്ന കാബിനുകൾക്കുള്ളിൽ കുടുങ്ങികിടന്ന ഡ്രൈവർമാരെ തലശ്ശേരി അഗ്നിശമന സേനാ അംഗങ്ങൾ അര മണിക്കൂറോളം സാഹസപ്പെട്ടാണ് രക്ഷപ്പെടുത്തിയത്. ഇരുവരുടെയും പരിക്ക് ഗുരുതരമല്ല.
കണ്ടെയ്നർ ലോറിയുടെ ഡ്രൈവർ തൃശൂർ സ്വദേശി പ്രദീഷ് തലശ്ശേരി സഹകരണ ആശുപത്രിയിലും മഹീന്ദ്ര ലോറി ഡ്രൈവർ ചിറ്റാരിപറമ്പ് ചൂണ്ട സ്വദേശി പ്രസാദ് (40) ജനറൽ ആശുപത്രിയിലുമാണുള്ളത്. കൂട്ടിയിടിയുടെ ആഘാതത്തിൽ റോഡിൽ നിന്നും തെന്നിയ ലോറികൾ തൊട്ടപ്പുറം കോരച്ചാം കണ്ടി കുന്നിന്റെ സംരക്ഷണഭിത്തിക്കടുത്ത് ചളിയിൽ അകപ്പെട്ട് നിൽകുകയായിരുന്നു. അപകടത്തെ തുടർന്ന് ദേശീയ പാതയിൽ നാല് മണിക്കൂറോളം ഗതാഗത തടസമുണ്ടായി. സ്റ്റേഷൻ ഓഫിസർ എം.എസ് ശശിധരന്റെ നേതൃത്വത്തിൽ അഗ്നി രക്ഷാ സേനയാണ് ഡ്രൈവർമാരെ രക്ഷപ്പെടുത്തിയത്.
