കണ്ണൂര്‍: തളിപ്പറമ്പില്‍ ജലസമൃദ്ധി പദ്ധതി നവംബര്‍ രണ്ടിന് തുടക്കം കുറിക്കും. നബാര്‍ഡിന്‍റെ കീഴിലുള്ള നിഡയുടെ ധനസഹായത്തോടെയാണ് സംസ്ഥാന സര്‍ക്കാര്‍ പദ്ധതി നടപ്പാക്കുന്നത്. തിങ്കളാഴ്‌ച ഉച്ചക്ക് രണ്ട് മണിക്ക് കൃഷിമന്ത്രി വിഎസ്‌ സുനില്‍ കുമാര്‍ ഓണ്‍ലൈനായി പദ്ധതി ഉദ്‌ഘാടനം ചെയ്യും. തളിപ്പറമ്പ് നിയോജക മണ്ഡലത്തിലെ ഒമ്പത്‌ തദ്ദേശഭരണ സ്ഥാപനങ്ങളിലെ ഒമ്പത്‌ നീർത്തട പ്രദേശങ്ങളിലായാണ് ജല സമൃദ്ധി പദ്ധതി നടപ്പിലാക്കുന്നത്.
മണ്ണ്-ജല സംരക്ഷണ പ്രവർത്തനങ്ങളിലൂടെ ജലസുരക്ഷ ഉറപ്പാക്കുക, ജല സമ്പത്തിലൂന്നിയുള്ള സമഗ്ര കാർഷിക വികസനം കൈവരിക്കുക എന്നിവയാണ് പദ്ധതിയിലൂടെ ലക്ഷ്യമിടുന്നത്. വീടുകളിൽ കിണർ റീചാർജ്ജിങ്‌, ഭൂഗർഭ ജല പോഷണ സംവിധാനമൊരുക്കൽ, പൊതുസ്ഥാപനങ്ങളിൽ മഴവെള്ള സംഭരണ സംപോഷണ സംവിധാനങ്ങൾ ഒരുക്കൽ, തോടുകളുടെയും നീർച്ചാലുകളുടെയും സംരക്ഷണ - പുനരുജ്ജീവന പ്രവർത്തനങ്ങൾ, ജലസ്രോതസുകളുടെ വികസനം തുടങ്ങിയവയാണ് പദ്ധതിയുടെ ഭാഗമായി നടപ്പാക്കുന്നത്. ഉദ്ഘാടന ചടങ്ങിൽ ധനവകുപ്പ് മന്ത്രി ഡോ.തോമസ് ഐസക്ക് മുഖ്യപ്രഭാഷണം നടത്തുമെന്നും ജയിംസ് മാത്യു എംഎൽഎ പറഞ്ഞു.
