തളിപ്പറമ്പ്: കീഴാറ്റൂര്‍ ബൈപ്പാസ് വിരുദ്ധ സമര നേതാവ് സുരേഷ് കീഴാറ്റൂർ കണ്ണൂര്‍ മണ്ഡലത്തിൽ നിന്നും ലോക്സഭയിലേക്ക് മത്സരിക്കും. 'പാരിസ്ഥിതിക കേരളത്തിന് ഒരു വോട്ട്’ എന്ന മുദ്രാവാക്യമുയർത്തിയാണ് തെരഞ്ഞെടുപ്പ് പ്രചാരണത്തിനിറങ്ങുകയെന്ന് സുരേഷ് കീഴാറ്റൂർ പറഞ്ഞു. പരിസ്ഥിതിപ്രവർത്തകരുടെ ശബ്ദമായാണ് മത്സരിക്കുന്നത്. തെരഞ്ഞെടുപ്പിൽ ജയ പരാജയങ്ങള്‍ പ്രശ്നമല്ല, വയൽക്കിളികളുടെ പോരാട്ടമാണിത്. പ്രളയാനന്തരകേരളത്തിൽ ഇടത്-വലത് രാഷ്ട്രീയപ്പാര്‍ട്ടികള്‍ കോർപ്പറേറ്റുകളുടെ അജണ്ടയാണ് നടപ്പിലാക്കുന്നതെന്നും സുരേഷ് കീഴാറ്റൂർ പറഞ്ഞു.
സിപിഎമ്മിന്‍റെ തട്ടകമായ കണ്ണൂരിലാണ് മുൻ പാർട്ടി പ്രവർത്തകനായ സുരേഷ് മത്സരത്തിനിറങ്ങുന്നതെന്നതും നിർണായകമാണ്. ദേശീയപാതക്കായി കീഴാറ്റൂരിൽ വയൽ നികത്താനുള്ള നീക്കത്തിനെതിരേ സമരത്തിനിറങ്ങിയാണ് സിപിഎമ്മുമായി സുരേഷ് അകലാൻ കാരണമായത്. വയൽക്കിളികളുടെ നേതൃത്വത്തിൽ നടന്ന സമരങ്ങൾക്ക് ചുക്കാൻ പിടിച്ചതും സുരേഷ് കീഴാറ്റൂരായിരുന്നു.
