കണ്ണൂര്‍: കേരളത്തിൽ ഭീകരവാദത്തെ വളർത്തുന്നത് ഇടതുപക്ഷമാണെന്ന് ബി.ജെ.പി സംസ്ഥാന ജനറൽ സെക്രട്ടറി കെ.സുരേന്ദ്രൻ. സിപിഎമ്മിന് ഏറ്റവും സ്വാധീനമുള്ള കണ്ണൂരിലെ പാർട്ടി ഗ്രാമങ്ങളിൽ നിന്നാണ് ഐഎസ് റിക്രൂട്ട്മെന്‍റ് നടക്കുന്നത്. ഐഎസ് പരിശീലനം കിട്ടിയവരാണ് ചെഗുവേരയുടെ കൊടി പിടിച്ച് നടക്കുന്നതെന്നും സുരേന്ദ്രൻ പറഞ്ഞു.
കേരളത്തിൽ ഭീകരവാദം വളർത്തുന്നത് ഇടതുപക്ഷം ; കെ സുരേന്ദ്രൻ ലോകത്തിലെ അവസാനത്തെ കമ്യൂണിസ്റ്റ് സർക്കാരാണ് കേരളം ഭരിക്കുന്നത് എന്ന് ബോധ്യം പിണറായി സർക്കാറിനുണ്ട്. അതിനാലാണ് കടം വാങ്ങി കട്ടുമുടിക്കുന്നത്. പാമ്പിൻ മാളങ്ങൾ പോലും അടയ്ക്കാൻ കഴിയാത്തവർ എങ്ങനെയാണ് കേരളത്തിൽ മികച്ച ഭരണം കാഴ്‌ചവെക്കുന്നതെന്നും അദ്ദേഹം ചോദിച്ചു.കേരളത്തിലെ മന്ത്രിമാർ വിദേശത്ത് പോയി ചെലവഴിക്കുന്ന പണത്തിന് കണക്ക് പറയേണ്ടിവരും. ഡി.വൈ.എഫ്.ഐ പ്രവർത്തകർ ചൂണ്ടയിട്ടും തീറ്റമത്സരങ്ങൾ നടത്തിയുമാണ് കൂത്തുപറമ്പ് രക്തസാക്ഷി ദിനം കൊണ്ടാടുന്നത്. പാർട്ടി എത്രത്തോളം അധപതിച്ചു എന്നതിനുള്ള ഉദാഹരണിതെന്നും അദ്ദേഹം ചൂണ്ടിക്കാട്ടി. തലശ്ശേരി പുതിയ ബസ്സ്റ്റാൻഡിൽ നടന്ന പരിപാടിയിൽ ബി.ജെ.പി തലശ്ശേരി മണ്ഡലം പ്രസിഡന്‍റ് എം.പി സുമേഷ് അധ്യക്ഷനായി. നേതാക്കളായ മോഹനൻ മാനന്തേരി, അഡ്വ. ബി രത്നാകരൻ, ടി എം ജിതേഷ് തുടങ്ങിയവർ സംസാരിച്ചു.
