കണ്ണൂർ : അലഹബാദ് തൊട്ട് അലവിൽ വരെയുള്ള നിരീക്ഷകരുടെ സാന്നിധ്യത്തില്‍ കണ്ണൂരിലെ കടലിൽ പക്ഷികളുടെ കണക്കെടുപ്പ്. ആടിയുലയുന്ന ബോട്ടിലായിരുന്നെങ്കിലും സൂക്ഷ്‌മതയോടെയായിരുന്നു പക്ഷി നിരീക്ഷണം. കടലിലെ പക്ഷികളുടെ ഫോട്ടോകളും പകർത്തി.
പതിനൊന്ന് പക്ഷിയിനങ്ങളെയാണ് കടലിൽ കണ്ടത്. കടൽ കാക്കകളുടെയും കടലാളകളുടെയും എണ്ണം കുറഞ്ഞത് ഇവരെ നിരാശരാക്കി. മുൾവാലൻ, കരണ്ടി വാലൻ, കോഴി വാലൻ, സ്‌കൂവകൾ, തിര വെട്ടികൾ ,കടൽ കാക്കകൾ എന്നിവയെയാണ് ഉൾക്കടലിലും തീരത്തുമായി കണ്ടെത്തിയത്.
20 നോട്ടിക്കൽ മൈൽ ഉൾക്കടലുവരെയാണ് കണക്കെടുപ്പ് നടന്നത്. കേരളവനം വകുപ്പ് സാമൂഹിക വനവത്കരണ വിഭാഗം, പരിസ്ഥിതി സംഘടനകളായ മലബാർ നാച്വറൽ ഹിസ്റ്ററി സൊസൈറ്റി, മലബാർ അവയർനെസ് ആൻഡ് റെസ്ക്യു സെൻറർ ഫോർ വൈൽഡ് ലൈഫ് എന്നിവയുടെ സഹകരണത്തോടെയായിരുന്നു കണക്കെടുപ്പ്. വനം വകുപ്പ് അസി കൺസർവേറ്റർ ജി പ്രദീപ് തളിപ്പറമ്പ് റേഞ്ച് ഓഫിസർ വി രതീശൻ, സത്യൻ മേപ്പയ്യൂർ തുടങ്ങിയവരാണ് പരിപാടിയിൽ പങ്കെടുത്തത്.
