തൊഴിലാളികളുമായി പോയ ജീപ്പിനുനേരെ കാട്ടാനയുടെ ആക്രമണം

തിങ്കളാഴ്‌ച രാവിലെ ആനയിറങ്കൽ എസ് വളവിൽ വച്ചാണ് ജീപ്പിന് നേരെ കാട്ടാനയുടെ ആക്രമണമുണ്ടായത്

ഇടുക്കി: ഇടുക്കിയിൽ തൊഴിലാളി സ്‌ത്രീകളുമായി പോയ ജീപ്പിനുനേരെ കാട്ടാനയുടെ ആക്രമണം. പെരിയ കനാൽ സ്വദേശി കെ. ചെല്ല പാണ്ടിയുടെ ജീപ്പാണ് ഒറ്റയാൻ ആക്രമിച്ച് കേടുപാടുകൾ വരുത്തിയത്. തിങ്കളാഴ്‌ച രാവിലെ ആനയിറങ്കൽ എസ് വളവിൽ വച്ചാണ് ജീപ്പ് കാട്ടാനയുടെ മുന്നിൽപെട്ടത്. സൂര്യനെല്ലിയിൽ നിന്നും പൂപ്പാറയിലേക്ക് തൊഴിലാളികളുമായി പോയ ജീപ്പിന് നേരെയാണ് കാട്ടാനയുടെ ആക്രമണം. ജീപ്പിൻ്റെ ഗ്ലാസും ബോണറ്റും കാട്ടാന അടിച്ചു തകർത്തു. തുടർന്ന് ഡ്രൈവർ ചെല്ലപാണ്ടി വാഹനത്തിൽ നിന്നും അമിത ശബ്‌ദമുണ്ടാക്കിയതിനെ തുടർന്ന് ആന വഴി മാറുകയായിരുന്നു.