ഇടുക്കി: ചിന്നക്കനാല് സൂര്യനെല്ലിയില് കുട്ടിയടക്കം മൂന്ന് പേരെ വീടിനുള്ളില് മരിച്ച നിലയില് കണ്ടെത്തിയ സംഭവത്തില് ദുരൂഹത തുടരുന്നു. കുടുംബ പ്രശ്നങ്ങളോ സാമ്പത്തിക ബാധ്യതകളോ ഇല്ലാതിരുന്ന കുടുംബം എന്തിന് ആത്മഹത്യ ചെയ്തുവെന്നതിന് ഇപ്പോഴും വ്യക്തത കൈവന്നിട്ടില്ല. ആറാം ക്ലാസ്സ് വിദ്യാര്ഥി ശരണ്യയുടെ വേര്പാടാണ് നാട്ടുകാരെ കൂടുതല് വേദനിപ്പിക്കുന്നത്. സ്കൂളില് കലാ കായിക രംഗത്ത് മുന്നില് നിന്നിരുന്ന ശരണ്യ അധ്യാപകരുടേയും പ്രിയപ്പെട്ടവളായിരുന്നു.
കഴിഞ്ഞ ദിവസം രാത്രിയോടെയാണ് ചിന്നക്കനാല് ചെമ്പകത്തൊഴു ആദിവാസിക്കുടിയിലെ വീടിനുള്ളില് രാമകൃഷ്ണന്, ഭാര്യ രജനി, ഇവരുടെ മകള് ആറാം ക്ലാസ് വിദ്യാര്ഥിനി ശരണ്യ എന്നിവരെ തൂങ്ങി മരിച്ച നിലയില് കണ്ടെത്തിയത്. രാമകൃഷ്ണനും ഭാര്യയും ഹാളിനുള്ളില് ഒരു കയറിന്റെ ഇരുവശത്തായും, കുട്ടിയെ സമീപത്തെ മുറിയിലും തൂങ്ങിയ നിലയില് കണ്ടെത്തുകയായിരുന്നു. രാമകൃഷ്ണന്റെ തമിഴ്നാട്ടിലുള്ള ബന്ധുക്കള് നിരവധി തവണ ഫോണ് ചെയ്തിട്ടും ഇവരെ ലഭിക്കാതെ വന്നതോടെ അയല്വാസിയോട് അന്വേഷിക്കാന് പറയുകയായിരുന്നു. തുടര്ന്ന് അയല്വാസി വീട്ടിലെത്തി പരിശോധിച്ചപ്പോഴാണ് മരണ വിവരം പുറത്തറിയുന്നത്.