ഇടുക്കി: വയനാടിന് സഹായവുമായി മൂന്നാറിലെ ആംഗ്ലോ തമിഴ് മീഡിയം എല്‍പി സ്‌കൂള്‍ വിദ്യാര്‍ഥികള്‍. വിദ്യാലയത്തിലെ കുട്ടികള്‍ കുടുക്കകളില്‍ നിന്നും സ്‌കൂള്‍ അധികൃതര്‍ക്ക് നല്‍കിയ തുക മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്തു. കാലവര്‍ഷത്തില്‍ മൂന്നാറും ഏറെ ദുരിതം നേരിട്ടിരുന്നു. സ്‌കൂളിലെ മൂന്നാം ക്ലാസുകാരിയായ സംയുക്ത കഴിഞ്ഞ ദിവസം തന്റെ കുടുക്ക ഒന്നാകെ സ്‌കൂളിലെ പ്രഥമ അധ്യാപികയെ ഏല്‍പ്പിച്ചിരുന്നു. തുടര്‍ന്നാണ് മറ്റ് കുട്ടികളും ദുരിത ബാധിതരെ സഹായിക്കാന്‍ മനസുമായി മുന്നോട്ട് എത്തിയത്.
വയനാടിന് കൈത്താങ്ങായി സംയുക്തയും കൂട്ടുകാരും മൂന്നാര്‍ കൂടാര്‍വിള നിത്യക്കുടി ഡിവിഷനിലെ തൊഴിലാളികളായ മാളവി കറുപ്പ് - സ്വാമി ദമ്പതികളുടെ മകളാണ് മൂന്നാം ക്ലാസുകാരിയായ സംയുക്ത. കഴിഞ്ഞ മഴയില്‍ വീട്ടില്‍ വെള്ളം കയറിയതിനെ തുടര്‍ന്ന് സംയുക്തയും മാതാപിതാക്കളും ദുരിതാശ്വാസ ക്യാമ്പിലായിരുന്നു കഴിഞ്ഞിരുന്നത്. എന്നാല്‍ തങ്ങള്‍ അനുഭവിക്കുന്ന ദുരിതത്തേക്കാള്‍ വലിയ ദുരിതം മറ്റ് ചിലര്‍ അനുഭവിക്കുന്നത് കണ്ട് ഈ കുഞ്ഞുമനസലിഞ്ഞു. ദുരിത ബാധിതരുടെ കണ്ണീരൊപ്പാന്‍ തന്നാലാവുന്നത് ചെയ്യണമെന്ന് മനസിലുറപ്പിച്ചതോടെ ക്യാമ്പില്‍ നിന്നും തിരികെ വീട്ടിലെത്തിയ സംയുക്ത രണ്ട് വര്‍ഷമായി താന്‍ ശേഖരിച്ച നാണയ തുട്ടുകള്‍ ഉള്‍ക്കൊള്ളുന്ന കുടുക്കയുമായി സ്‌കൂളിലെത്തി. കുടുക്കക്കുള്ളിലെ പണം ദുരിതബാധിതര്‍ക്ക് നല്‍കാന്‍ സംയുക്ത അധ്യാപകരോട് ആവശ്യപ്പെട്ടു. കുഞ്ഞുമനസിന്‍റെ നന്മ കണ്ട് മുഖ്യമന്ത്രിയുടെ ദുരിതാശ്വാസ നിധിയിലേക്ക് തുക സംഭാവന ചെയ്യുന്ന കാര്യം താന്‍ മറ്റ് കുട്ടികളെ അറിയിക്കുകയായിരുന്നുവെന്ന് സ്‌കൂളിലെ പ്രഥമ അധ്യാപിക മാരിയമ്മ പറഞ്ഞു.വാര്‍ത്തകളില്‍ നിറഞ്ഞ് നിന്ന ദുരിത ചിത്രങ്ങള്‍ തന്നെ വല്ലാതെ വിഷമിപ്പിച്ചതായും തനിക്ക് കഴിയുന്നത് ചെയ്യണമെന്ന് മാത്രമെ സ്‌കൂളില്‍ കുടുക്കയുമായി എത്തുമ്പോള്‍ കരുതിയിരുന്നുള്ളുവെന്നും സംയുക്ത പറയുന്നു. മഴക്കെടുതി ബാധിച്ച തോട്ടം മേഖലയില്‍ നിന്നുള്ള 136 കുട്ടികളാണ് മൂന്നാര്‍ ആംഗ്ലോ തമിഴ് മീഡിയം എല്‍പി സ്‌കൂളില്‍ പഠനം നടത്തുന്നത്. ഇല്ലായ്മക്കു നടുവില്‍ നിന്നും കുട്ടികള്‍ ആകെ സമാഹരിച്ച 2642 രൂപ അധ്യാപകരുടെ നേതൃത്വത്തില്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്തു.
