ഇടുക്കി : ജില്ലയിൽ പശുക്കൾക്ക് ചര്‍മ്മമുഴ രോഗം വ്യാപകമാകുന്നു. അയ്യപ്പൻകോവിൽ ഗ്രാമപഞ്ചായത്ത് പരിധിയിലെ നിരവധി കർഷകരുടെ പശുക്കൾക്കാണ് തീവ്ര വ്യാപന ശേഷിയുള്ള ഈ രോഗം പിടിപെട്ടിരിക്കുന്നത്. കാലിത്തീറ്റയ്ക്ക്‌ വില വർധിച്ചതോടെ പ്രതിസന്ധിയിലായ ക്ഷീരകർഷകർക്ക് ഇരുട്ടടി ആയിരിക്കുകയാണ് കാലികൾക്ക് പിടിപെട്ടിരിക്കുന്ന ചര്‍മ്മമുഴ എന്ന രോഗം.
തീവ്ര വ്യാപന ശേഷിയുള്ള ഈ വൈറസ് രോഗം പശുക്കള്‍ക്ക് പിടിപെടുന്നതോടെ ശരീരത്തില്‍ മുഴകൾ പ്രത്യക്ഷപ്പെടുന്നു. അവ വലുതായി പൊട്ടുകയും ചെയ്യും. ഒരു പശുവിന് ഉണ്ടാകുന്ന രോഗം പരിസരത്ത് വളർത്തുന്ന വിവിധ പശുക്കളിലേക്ക് വ്യാപിക്കുന്നു.
Also Read: കന്നുകാലികളിൽ ചർമ്മമുഴ രോഗം പടരുന്നു; ക്ഷീര കര്‍ഷകര്‍ പ്രതിസന്ധിയില്‍
പാൽ ഉത്പാദനം കുറയുന്നതോടൊപ്പം പശുക്കൾ അവശനിലയില്‍ ആവുകയും ചെയ്യും. കാലിൽ നീര്, ശക്തമായ പനി, ശരീരത്തിൽ ഉണ്ടാകുന്ന മുഴകൾ ഇവയെല്ലാമാണ് രോഗലക്ഷണം. അയ്യപ്പൻകോവിൽ ഗ്രാമപഞ്ചായത്തിൽ നിരവധി പശുക്കള്‍ക്ക് രോഗം പിടിപെട്ടതോടെ 50 ഓളം കർഷകരുടെ പശുക്കള്‍ക്ക് പ്രതിരോധ വാക്‌സിൻ എടുത്തു. എന്നാൽ ശ്വാശ്വതമായ മരുന്ന് ലഭ്യമാകുന്നില്ലെന്നും ഗ്രാമപഞ്ചായത്ത് കാര്യമായ ഇടപെടൽ നടത്തുന്നില്ലെന്നുമാണ് കർഷകരുടെ പരാതി.
അതോടെ വലിയ തുക ചെലവഴിച്ച് കർഷകർ മരുന്ന് വാങ്ങി നൽകുകയാണ്. അതേ സമയം എൽ എസ് ഡി എന്ന പ്രതിരോധ വാക്‌സിൻ നൽകുന്നുണ്ടെന്നും രോഗം സ്ഥിരീകരിച്ച പശുക്കള്‍ക്ക് ആന്‍റിബയോട്ടിക്, ഇൻജക്ഷൻ ഉൾപ്പടെയുള്ളവ നൽകുന്നുണ്ടെന്നുമാണ് മൃഗാശുപത്രി അധികൃതർ നൽകുന്ന വിശദീകരണം. പഞ്ചായത്ത്‌ വാഹന സൗകര്യം ഏർപ്പെടുത്തേണ്ടതുണ്ടെന്നും രോഗം ശ്രദ്ധയിൽപ്പെട്ടാൽ ആളുകൾ കൃത്യമായി വിവരം അറിയിക്കണമെന്നും മൃഗാശുപത്രി അധികൃതർ പറഞ്ഞു.
