ഇടുക്കി: സേനാപതി പഞ്ചായത്ത് ഭരണം പ്രതിസന്ധിയില്‍. യുഡിഎഫിനെ വെട്ടിലാക്കി കോണ്‍ഗ്രസ് അംഗം രാജിവച്ചു. മുന്നണി ധാരണപ്രകാരം നിലവിലുള്ള പ്രസിഡന്റ് ജോസ് കാഞ്ഞിരക്കോണം പ്രസിഡന്റ് പദവി രാജിവെച്ചൊഴിയാത്തതിനെ തുടര്‍ന്നാണ് ഒമ്പതാം വാര്‍ഡ് അംഗം ജോണി മാമ്പിള്ളി രാജി സമര്‍പ്പിച്ചത്. അവസാന ഒരു വർഷം പ്രസിഡന്റ് പദവി നൽകാം എന്ന ധാരണ മുന്നണി പാലിക്കാതെ വന്നതോടെയാണ് രാജി . ഇതോടെ പഞ്ചായത്തില്‍ യുഡിഎഫിന്‍റെ ഭൂരിപക്ഷം നഷ്ടമായി.
സേനാപതി പഞ്ചായത്ത് രൂപീകരിച്ചതിന് ശേഷം ആദ്യമായാണ് യു ഡി എഫ് ഇവിടെ അധികാരത്തിലെത്തുന്നത്. ആദ്യം പ്രസിഡന്റായി തെരഞ്ഞെടുത്തത് നിലവില്‍ രാജിവച്ച ജോണി മാമ്പിള്ളിയെയായിരുന്നു. ഇതിന് ശേഷം ഒന്നര വര്‍ഷം പിന്നിട്ടപ്പോള്‍ ഗ്രൂപ്പ് പോര് രൂക്ഷമായതിനെ തുടര്‍ന്ന് ഡി സി സി യുടെ നിര്‍ദ്ദേശ പ്രകാരം ജോണി മാമ്പിള്ളി രാജിവെയ്ക്കുകയും ജോസ് കാഞ്ഞിരകോണം പ്രസിഡന്റാകുകയും ചെയ്തു.
അവസാന ഒരു വര്‍ഷം ജോണി മാമ്പിള്ളിക്ക് പ്രസിഡന്റ് സ്ഥാനം തിരിച്ച് നൽകാമെന്ന ധാരണ എഴുതിയുണ്ടാക്കിയതിന് ശേഷമായിരുന്നു ഭരണ നേതൃത്വമാറ്റം ഉണ്ടായത്. ഒരു ഗ്രൂപ്പിലുമില്ലാതെ നിഷ്പക്ഷമായി നിന്ന തന്നെ ഇരുഗ്രൂപ്പിലെയും നേതാക്കന്മാര്‍ അവഗണിക്കുകയായിരുന്നെന്നും ഏതെങ്കിലും ഗ്രൂപ്പില്‍ നിന്ന് നേതാക്കന്മാരെ പ്രീതിപ്പെടുത്താതെ കോൺഗ്രസ് പാര്‍ട്ടിയില്‍ പ്രവര്‍ത്തിക്കാന്‍ കഴിയില്ലെന്നും ജോണി മാമ്പിള്ളി പറഞ്ഞു.
