ഇടുക്കി: പേരുപോലെ തന്നെ കാഴ്ച്ചകൾ കൊണ്ടും അതിമനോഹരമാണ് ഇലവീഴാപൂഞ്ചിറ. കോട്ടയം - ഇടുക്കി ജില്ലയുടെ അതിർത്തിയായ ഈ മലമുകളിൽ നിന്നാൽ അഞ്ചു ജില്ലകളുടെ വിദൂര ദൃശ്യം ആസ്വദിക്കാം. സമുദ്രനിരപ്പിൽ നിന്ന് 3,200 അടി ഉയരത്തിൽ ആണ് ഇലവീഴാപൂഞ്ചിറ.
വനവാസകാലത്ത് പാണ്ഡവർ ഇവിടെ താമസിച്ചതായാണ് ഐതിഹ്യം. ഭീമസേനൻ പാഞ്ചാലിക്കായി നിർമിച്ചതെന്ന് ഐതീഹ്യമുള്ള ഒരു ചിറ, ഇവിടെയുള്ള ഒരു ക്ഷേത്രത്തിനു സമീപം ഉണ്ട് . ഇലവീഴില്ല എന്ന് വിശ്വസിക്കുന്ന ഈ ചിറയുള്ള പ്രദേശത്തിന് കാലക്രമേണ ഇലവീഴാപൂഞ്ചിറ എന്ന പേര് കിട്ടി.
ഇവിടെനിന്നുള്ള ഉദയാസ്‌തമയ കാഴ്‌ചകൾ അതിമനോഹരമാണ്. മഴയും മഞ്ഞും മാറി മാനം തെളിഞ്ഞാൽ ആയിരക്കണക്കിന് അടി താഴെയായി മലങ്കര അണക്കെട്ടും വേമ്പനാട്ടുകായലും നെടുമ്പാശേരിയും കാണാം. വ്യൂ പോയിന്‍റില്‍ നിന്ന് നോക്കിയാൽ കോട്ടയം ആലപ്പുഴ പത്തനംതിട്ട എറണാകുളം ഇടുക്കി ജില്ലകൾ കാണാം.
ട്രക്കിംഗിന് പറ്റിയ പ്രദേശമാണ് ഇലവീഴാപൂഞ്ചിറ . ആയിരക്കണക്കിന് പരുന്നു കിടക്കുന്ന ഇവിടം ഒരു ട്രക്കിംഗ് കേന്ദ്രമാക്കി ഡിടിപിസി വികസിപ്പിച്ചു കൊണ്ടിരിക്കുകയാണ്.
