ഇടുക്കി: കേരള ബാങ്ക് ആരംഭിക്കുന്നതോടെ വലിയ മാറ്റമാണ് കേരളത്തില്‍ ഉണ്ടാകുകയെന്ന് മുഖ്യമന്ത്രി പിണറായി വിജയൻ. വമ്പിച്ച സാധ്യതകളാണ് ബാങ്ക് മുന്നോട്ട് വയ്ക്കുന്നത്. സഹകരണ സംഘങ്ങൾ വഴി ഇപ്പോൾ ലഭിക്കുന്നതിനേക്കാൾ കൂടുതൽ വായ്‌പകൾ നൽകുവാൻ കേരള ബാങ്കിലൂടെ കഴിയുമെന്നും മുഖ്യമന്ത്രി വ്യക്തമാക്കി. 66-ാമത് അഖിലേന്ത്യാ സഹകരണ വാരാഘോഷങ്ങളുടെ സംസ്ഥാനതല ഉദ്‌ഘാടനം കട്ടപ്പനയിൽ നിർവഹിച്ചു സംസാരിക്കുകയായിരുന്നു മുഖ്യമന്ത്രി.
സഹകരണ സംഘങ്ങൾ മേന്മ അവകാശപ്പെടുമ്പോഴും ഹ്രസ്വകാല വായ്‌പാ പദ്ധതികൾക്ക് ഊന്നൽ നൽകുവാൻ സംഘങ്ങൾക്ക് കഴിയണം. പ്രാഥമിക കാർഷിക വായ്‌പാ സഹകരണ സംഘങ്ങളാണെന്ന തിരിച്ചറിവ് സ്ഥാപനങ്ങൾ മറക്കരുതെന്നും പിണറായി വ്യക്തമാക്കി.
സഹകരണ മേഖല പൂർണമായും അഴിമതി രഹിതമാണെന്ന് പറയുവാൻ കഴിയില്ല. ചെറിയതോതിൽ പോലും അഴിമതി ഉണ്ടായാൽ മേഖലയുടെ കരുത്തിനെ ബാധിക്കുന്ന വൈറസായി മാറും. വലിയ ജാഗ്രത ഉണ്ടെങ്കിൽ മാത്രമേ അതിജീവിക്കുവാൻ കഴിയുകയുള്ളൂവെന്നും അദ്ദേഹം പറഞ്ഞു. മന്ത്രിമാരായ കടകംപള്ളി സുരേന്ദ്രൻ, എംഎം മണി , എംപി ഡീൻ കുര്യക്കോസ്, റോഷി അഗസ്റ്റിൻ എംഎൽഎ തുടങ്ങിയവരും വിവിധ സഹകരണ സംഘങ്ങളിൽ നിന്നായി ആയിരത്തിലധികം സഹകാരികൾ പൊതുസമ്മേളനത്തിൽ പങ്കെടുത്തു. വാരാഘോഷത്തിന്റെ സമാപന സമ്മേളനത്തോടനുബന്ധിച്ച് കട്ടപ്പനയിൽ സഹകരണ റാലിയും നടന്നു.
