ഇടുക്കി: ലാബ് കെട്ടിടം വിട്ടുകിട്ടണമെന്നാവശ്യപ്പെട്ട് മൂന്നാര്‍ എഞ്ചിനീയറിങ് കോളജിലെ വിദ്യാര്‍ഥികള്‍ നടത്തിയ അനിശ്ചിതകാല സമരം അവസാനിപ്പിച്ചു. മൂന്ന് മാസത്തിനുള്ളില്‍ പ്രശ്‌നത്തിന് ശാശ്വത പരിഹാരം കാണുമെന്ന അധികൃതരുടെ ഉറപ്പിന്മേലാണ് സമരം അവസാനിപ്പിച്ചത്. എസ്.രാജേന്ദ്രന്‍ എം.എല്‍.എ, ആര്‍ട്‌സ് കോളജ് ഡി.ഡി. ഡോ. സതീശന്‍, സി.സി.കെ ഡയറക്‌ടര്‍ ഡോ.അനിത, കെ. ദമയന്തി, ഇരുകോളജുകളുടെയും പ്രിന്‍സിപ്പാളുമാര്‍ തുടങ്ങിയവരുമായി ചര്‍ച്ച നടത്തിയെന്നും ഇതിന്‍റെ അടിസ്ഥാനത്തില്‍ സമരം അവസാനിപ്പിക്കാന്‍ തീരുമാനിക്കുകയായിരുന്നുവെന്നും വിദ്യാര്‍ഥികള്‍ പറഞ്ഞു.
കഴിഞ്ഞ പ്രളയത്തില്‍ മണ്ണിടിച്ചിലിനെ തുടര്‍ന്ന് മൂന്നാര്‍ ആര്‍ട്‌സ് കോളജ് കെട്ടിടം ഭാഗികമായി തകര്‍ന്നിരുന്നു. പഠനം മുടങ്ങിയതോടെ എഞ്ചിനീയറിങ് കോളജിന്‍റെ ലാബ് കെട്ടിടത്തില്‍ ആര്‍ട്‌സ് കോളജിലെ വിദ്യാര്‍ഥികള്‍ക്ക് താല്‍ക്കാലിക പഠന സംവിധാനമൊരുക്കി. ആറ് മാസത്തിനുള്ളില്‍ ബദല്‍ സംവിധാനമൊരുക്കി ആര്‍ട്‌സ് കോളേജ് പുതിയ സ്ഥലത്തേക്ക് മാറ്റുമെന്നായിരുന്നു നേരത്തെ അറിയിച്ചത്. എന്നാല്‍ ഒരു വര്‍ഷം പിന്നിട്ടിട്ടും പ്രശ്‌നത്തിന് പരിഹാരം കാണാത്ത സാഹചര്യത്തിലായിരുന്നു എഞ്ചിനീയറിങ് കോളജ് വിദ്യാര്‍ഥികള്‍ പ്രത്യക്ഷസമരവുമായി രംഗത്തെത്തിയത്.
