ഇടുക്കി: ശുദ്ധമായ പ്രാണവായു ശ്വസിച്ച് മേഘങ്ങളെ തൊടാൻ കൊതിക്കുന്നവർക്ക് മലമുകളിൽ ഒരു വന്യമായ കൂടാരം ഒരുക്കി കാത്തിരിക്കുകയാണ് ഇടുക്കി ജില്ലയിലെ വെണ്മണിയിലെ മീനുളിയാൻ പാറ. കഞ്ഞിക്കുഴി വണ്ണപ്പുറം പഞ്ചായത്തുകളിലായി സ്ഥിതി ചെയ്യുന്ന മീനുളിയാൻ പാറ സഞ്ചാരികളുടെ മനസിനെ കുളിർമയണിക്കുമെന്നതിൽ സംശയമില്ല. സമുദ്രനിരപ്പിൽ നിന്നും 891 അടി ഉയരത്തിലുള്ള ഈ മലമുകളിൽ എത്തിച്ചേർന്നാൽ പ്രകൃതി വിസ്‌മയത്തിന്‍റെ കാഴ്‌ചവട്ടങ്ങളാണ് സഞ്ചാരികൾക്കായി ഒരുക്കിയിട്ടുള്ളത്.
ആലപ്പുഴ മധുര ദേശീപാതയിലൂടെ സഞ്ചരിച്ചാൽ വെണ്മണിയിൽ എത്തിച്ചേരുവാൻ സാധിക്കും. ഇവിടെ നിന്നും ഒന്നര കിലോമീറ്റർ കാൽനടയായി കാനനപാതയിലൂടെ സഞ്ചരിച്ചാൽ മലമുകളിൽ എത്തിച്ചേരാം. മേഘങ്ങൾ തൊട്ട് തലോടുന്ന മലനിരകളും സദാസമയം വീശിയടിക്കുന്ന കാറ്റും നനുത്ത മഞ്ഞിൽ കുളിച്ചു നിൽക്കുന്ന ചെടികളും കാട്ടുപൂക്കളും സഞ്ചാരികളുടെ മനം കവരുന്ന കാഴ്ചയാണ്. വർഷം മുഴുവനുമുള്ള ടൂറിസം സാധ്യതകളാണ് മീനുളിയാൻ പാറയെ സമ്പന്നമാക്കുന്നത്. മലമുകളിലെ രണ്ട് ഏക്കറോളം വരുന്ന വനമേഖല ആരെയും അത്ഭുതപ്പെടുത്തുന്നതാണ്.
തെളിഞ്ഞ കാലാവസ്ഥയിൽ എറണാകുളം ജില്ലയുടെ പ്രധാന ഭാഗങ്ങളും മൂന്നാർ ഉൾപ്പെടെയുള്ള വിദൂര കാഴ്ചകളും പച്ചനിറത്തിൽ ഒഴുകുന്ന പെരിയാറിന്‍റെ മനോഹര ദൃശ്യവുമെല്ലാം സഞ്ചാരികൾക്ക് ആസ്വദിക്കാനാകും. വേനൽ കാലങ്ങളിലാണ് ഏറ്റവും കൂടുതൽ സന്ദർശകർ മീനുളിയാൻ പറയിൽ എത്തുന്നത്. മീനുളിയാൻ പാറ പഞ്ചപാണ്ഡവന്മാർ ഒളിച്ച് താമസിച്ച സ്ഥലമാണെന്നും അല്ല പെരിയാറിൽ നിന്ന് മീൻ ഒഴുകി വന്ന സ്ഥലം എന്നതുൾപ്പടെ ഈ പ്രദേശത്തെ ചുറ്റിപ്പറ്റി നിരവധി ഐതിഹ്യങ്ങളും നിലവിലുണ്ട്.
അഗാധമായ കൊക്കയും സുരക്ഷ സംവിധാനങ്ങളും അടിസ്ഥാന സൗകര്യങ്ങളും ഇല്ലാത്തതാണ് മീനുളിയാൻപാറയെ സഞ്ചാരികളിൽ നിന്നും അകറ്റുന്നത്. ഇക്കോ ടൂറിസത്തിന്റെ അനന്തസാധ്യതകൾ പ്രയോജനപ്പെടുത്തുവാൻ അധികൃതർ തയാറായാൽ കൂടുതൽ സഞ്ചാരികളെ ആകർഷിക്കുവാൻ സാധിക്കും.
READ MORE: ഇടുക്കിയിൽ ക്വാര്‍ട്ടേഴ്‌സ് കെട്ടിടങ്ങൾ നാശത്തിന്‍റെ വക്കിൽ; കണ്ട ഭാവം നടിക്കാതെ വകുപ്പുകൾ
