ഇടുക്കി: മൊബൈൽ ഫോൺ മോഷ്ടിച്ചുവെന്നാരോപിച്ച് കമ്പംമെട്ട് പൊലീസ് സ്റ്റേഷനിൽ വിളിച്ചുവരുത്തിയ യുവാവിനെ പൊലീസ് മർദിച്ചതായി പരാതി. പാറത്തോട് മണികണ്‌ഠവിലാസം മണികണ്‌ഠ(36) നാണ് മർദനമേറ്റത്. കമ്പംമെട്ട് ചെക്ക് പോസ്റ്റിൽ വാഹന പരിശോധനക്കിടെ എക്‌സൈസ് ഉദ്യോഗസ്ഥന്‍റെ മൊബൈൽ ഫോൺ നഷ്ടപ്പെട്ട കേസിലാണ് യുവാവിനെ സ്റ്റേഷനിലേക്ക് വിളിച്ചു വരുത്തിയത്.
കഴിഞ്ഞ ബുധനാഴ്ച രാത്രി 8.30ന് തമിഴ്‌നാട്ടിലെ തേവാരം പനായിപ്പുറത്ത് താമസിക്കുന്ന ഭാര്യയെയും മക്കളെയും കാണാനായി മണികണ്‌ഠൻ കമ്പംമെട്ട് ചെക്ക് പോസ്റ്റിലൂടെ കടന്നുപോയിരുന്നു. വാഹനത്തിൽ ഡ്രൈവറടക്കം നാല് പേരും ഒപ്പമുണ്ടായിരുന്നു. ചെക്ക്പോസ്റ്റിൽ യാത്ര രേഖ കാണിച്ച് രജിസ്റ്ററിൽ ഫോൺ നമ്പർ രേഖപ്പെടുത്തിയ ശേഷമാണ് ഇവരെ തമിഴ്‌നാട്ടിലേക്ക് കടത്തി വിട്ടത്.
ഇതിനിടെ ചെക്ക്പോസ്റ്റിൽ ഡ്യൂട്ടിയിലുണ്ടായിരുന്ന എക്‌സൈസ് ഉദ്യോഗസ്ഥന്‍റെ മൊബൈൽ ഫോൺ കാണാതായി. തുടർന്ന് ചെക്കുപോസ്റ്റിലെ സിസിടിവി പരിശോധിച്ചപ്പോൾ മണികണ്‌ഠൻ കുനിഞ്ഞ് നിലത്തുനിന്നും എന്തോ എടുക്കുന്നതായി കണ്ടു. ഇതേത്തുടർന്ന് എക്‌സൈസ് ഉദ്യോഗസ്ഥൻ കമ്പംമെട്ട് പൊലീസിൽ പരാതി നൽകി. തുടർന്ന് രജിസ്റ്ററിൽ രേഖപ്പെടുത്തിയിരുന്ന മണികണ്‌ഠന്‍റെ ഫോണിൽ പൊലീസ് ബന്ധപ്പെട്ട് അടുത്ത ദിവസം സ്റ്റേഷനിൽ ഹാജരാകാൻ ആവശ്യപ്പെട്ടു.
വ്യാഴാഴ്ച രാവിലെ സ്റ്റേഷനിലെത്തിയ മണികണ്‌ഠനെയും സുഹൃത്തുക്കളെയും കാര്യമെന്തെന്ന് പറയാതെ മോഷ്ടിച്ച ഫോൺ തിരികെ നൽകണമെന്നാവശ്യപ്പെട്ട് പൊലീസ് ഉദ്യോഗസ്ഥരുടെ നേതൃത്വത്തിൽ മർദനം ആരംഭിക്കുകയായിരുന്നെന്ന് മണികണ്‌ഠൻ പറയുന്നു.
Also Read: കാര്‍ഷിക നിയമങ്ങള്‍ പിൻവലിക്കില്ലെന്ന് ആവര്‍ത്തിച്ച് കേന്ദ്രം
മർദനം തുടർന്നതോടെ ഫോൺ മോഷ്ടിച്ചിട്ടില്ലെന്നും വേണമെങ്കിൽ പകരം ഫോൺ വാങ്ങി നൽകാമെന്ന് പറഞ്ഞതായും മണികണ്‌ഠൻ പറയുന്നു. ഇതിനിടെ പൊലീസ് സുഹൃത്തിന്‍റെ കയ്യിലിരുന്ന ഫോൺ തട്ടിപ്പറിച്ചതായും മണികണ്‌ഠൻ അരോപിച്ചു. കാണാതായ ഫോണിന്‍റെ ടവർ ലൊക്കേഷൻ എറണാകുളത്താണെന്ന് കണ്ടെത്തിയതോടെ മണികണ്‌ഠനെ പൊലീസ് വിട്ടയച്ചു.
മർദനത്തെത്തുടർന്ന് മൂത്രതടസം നേരിട്ടതോടെ നെടുങ്കണ്ടത്തെ സ്വകാര്യ ആശുപത്രിയിൽ ചികിത്സ തേടി. അകാരണമായി മർദിച്ച പൊലീസ് ഉദ്യോഗസ്ഥർക്കെതിരെ മുഖ്യമന്ത്രി, ഡിജിപി എന്നിവർക്ക് പരാതി നൽകുമെന്നും മണികണ്‌ഠൻ പറഞ്ഞു.
എന്നാൽ ആരോപണങ്ങൾ കമ്പംമെട്ട് പൊലീസ് നിഷേധിച്ചു. പൊലീസ് മർദനം ഉണ്ടായിട്ടില്ലെന്നും മണികണ്‌ഠനും സുഹൃത്തുക്കളും എത്തുന്നതിന്‍റെയും തിരികെ മടങ്ങുന്നതിന്‍റെയും ദൃശ്യങ്ങൾ സ്റ്റേഷനിലെ സിസിടിവിയിലുണ്ടെന്നും മറ്റ് ആരോപണങ്ങളെല്ലാം അടിസ്ഥാന രഹിതമാണെന്നും കമ്പംമെട്ട് പൊലീസ് അറിയിച്ചു.
