ഇടുക്കി: കർഷക കോൺഗ്രസ് ബൈസൺവാലി മണ്ഡലം കമ്മറ്റിയുടെ നേതൃത്വത്തിൽ കർഷക ഭൂമിയിൽ നിൽപ് സമരം നടത്തി. ഗ്യാപ്പ് റോഡിൽ ഉണ്ടായ ഉരുൾപൊട്ടലിനെ തുടർന്ന് കല്ലും മണ്ണും നിറഞ്ഞ കർഷകരുടെയും ആദിവാസികളുടെയും ഭൂമി കൃഷിയോഗ്യമാക്കി നൽകണമെന്ന് ആവശ്യപെട്ടാണ് നിൽപ് സമരം സംഘടിപ്പിച്ചത്.
അശാസ്ത്രീയ പാറ ഖനനത്തെ തുടർന്ന് ഉരുൾപൊട്ടലിൽ ബൈസൺവാലിയിലെ നിരവധി കർഷകരുടെയും ആദിവാസികളുടെയും ഭൂമി കൃഷിയോഗ്യമല്ലാതാകുകയും ചെയ്തിരുന്നു. കൃഷിയിറക്കുന്നതിന് അടിയന്തരമായി സർക്കാർ ഇടപെടൽ ഉണ്ടാകണമെന്നും കർഷകർക്ക് നഷ്ടപരിഹാരം നൽകണമെന്നും ആവശ്യപെട്ടു കൊണ്ടായിരുന്നു സമരം.