ഇടുക്കി: പ്ലാസ്റ്റിക് നിരോധനത്തിന് പിന്തുണ നല്‍കി അടിമാലി ഗ്രാമപഞ്ചായത്തിന്റെ തുണി സഞ്ചി പ്രദര്‍ശന മേള. ഗ്രാമപഞ്ചായത്തിന്റെ പരിധിയില്‍ വരുന്ന കുടുംബശ്രീ പ്രവര്‍ത്തകര്‍ നിര്‍മിച്ച തുണി സഞ്ചികളുടെ പ്രദര്‍ശനം പഞ്ചായത്ത് ടൗണ്‍ ഹാളില്‍ നടന്നു. തുണി സഞ്ചികളുടെ പരിചയപ്പെടുത്തലും വിപണന സാധ്യത തുറക്കലുമായിരുന്നു മേളയുടെ ലക്ഷ്യം. ഹരിത കേരള മിഷന്റെയും പഞ്ചായത്തിന്റെയും കുടുംബശ്രീയുടെയും സഹകരണത്തോടെ വിവിധ കുടുംബശ്രീ യൂണിറ്റുകള്‍ നിര്‍മിച്ച തുണി സഞ്ചികളാണ് മേളയില്‍ പ്രദര്‍ശനത്തിനെത്തിച്ചത്.
വ്യത്യസ്ത ഇനത്തിലും വലിപ്പത്തിലും വിലയിലും ഗുണമേന്മയിലുമുള്ള തുണി സഞ്ചികള്‍ മേളയിലുണ്ടായിരുന്നു. അടിമാലി ടൗണിലെ വ്യാപാര സമൂഹവും പൊതുപ്രവര്‍ത്തകരും വിവിധ ഉദ്യോഗസ്ഥ പ്രതിനിധികളും മേളയില്‍ സംബന്ധിച്ചു. ഹരിത കേരളമിഷനുമായി കൈകോര്‍ത്തായിരുന്നു കുടുംബശ്രീ അംഗങ്ങള്‍ക്ക് തുണി സഞ്ചി നിര്‍മാണ പരിശീലനം നല്‍കിയിരുന്നത്. മേളയിലൂടെ ആവശ്യക്കാരുടെ ഓര്‍ഡര്‍ ലഭിക്കുന്നതനുസരിച്ച് യൂണിറ്റുകള്‍ തുണി സഞ്ചി നിര്‍മിച്ച് നല്‍കും.
