ഇടുക്കി: അവധി ആഘോഷിക്കാന്‍ മൂന്നാറിലേക്കെത്തുന്ന സഞ്ചാരികള്‍ക്ക് കാഴ്ചയുടെ വസന്തകാലം തീര്‍ത്തിരിക്കുകയാണ് കാലം തെറ്റിപൂത്ത ചെറിബ്ലോസം. മഞ്ഞും തണുപ്പും നിറഞ്ഞ മൂന്നാറിന്‍റെ പച്ചപ്പിനിടയില്‍ ഇളം റോസ് നിറത്തില്‍ വസന്തം വിരിയിച്ച് നില്‍ക്കുന്ന ചെറിബ്ലോസം മരങ്ങള്‍ ആരെയും ആകര്‍ഷിക്കുന്ന കാഴ്ചയാണ്.
ഇത്തവണ പതിവിലും നേരത്തെയാണ് ബ്ലോസം വസന്തം മൂന്നാറില്‍ വിരുന്നെത്തിയത്. നവംബര്‍ മാസത്തിലാണ് ഈ മരങ്ങള്‍ വ്യാപകമായി പൂക്കുന്നതെങ്കിലും ഇത്തവണ ജൂലൈ മാസത്തില്‍ തന്നെ പൂത്ത് തുടങ്ങിയിരുന്നു. ഓഗസ്റ്റ് മധ്യത്തോടെ വ്യാപകമായി പൂവിട്ടു തുടങ്ങി. മാട്ടുപ്പെട്ടി, കുണ്ടള എന്നീ ഡാമുകളുടെ പരിസര പ്രദേശങ്ങളില്‍ പൂത്തുനില്‍ക്കുന്ന കാഴ്ച സഞ്ചാരികളുടെ മനം കുളിര്‍പ്പിക്കുന്നതാണ്. ചെണ്ടുവര, എല്ലപ്പെട്ടി, പുതുക്കടി തുടങ്ങിയ സ്ഥലങ്ങളിലും ഈ മരങ്ങള്‍ ധാരാളം പൂത്തു നില്‍ക്കുന്നുണ്ട്. പള്ളിവാസലില്‍ നിന്നും മൂന്നാറിലേക്കുള്ള പാതയിലും ഈ മരങ്ങള്‍ കാണാം. തേയിലക്കാടുകളോടു ചേര്‍ന്നു നില്‍ക്കുന്ന ചോലവനങ്ങളിലും ധാരാളമായി കാണപ്പെടുന്നുണ്ട്. ശൈത്യകാലമായ ഡിസംബറില്‍ മൂന്നാറിലെത്തുന്ന സഞ്ചാരികളെ ഏറ്റവും കൂടുതല്‍ ആകര്‍ഷിക്കുന്ന ഒന്നാണ് ചെറി ബ്ലോസം മരങ്ങള്‍.
